نحن لا نطلق الرصاص

بسم الله الرحمن الرحيم

النهارده 23 مايو .. يوم التدوين على المجلس العسكري .. الساعة دلوقت 8:10 الصبح ومقريتش اى حاجه لحد دلوقت غير هجوم هجوم
بعضه موضوعي وحقيقي والبعض الاخر محض أوهام وخزعبلات

هبدء بحوار
بين (ا) و (ب) .. اتنين مصريين اصدقاء واخوات،رفقاء كفاح
شافو مع بعض كتير اوي وكل واحد فيهم عارف ان التاني اهم حاجه عنده مصر

(ا)
انا عايز مجلس رئاسي مدني .. خلاص فاض بيا من الجيش
كلهم بتوع مبارك،وبيقولك ثورة مضاده وهما اصلا اللى عاملين الثورة المضاده

هعددلك مواقفهم من الاول:

-موقعة الجمل لما وقفو يتفرجو على المتظاهرين وهما بيموتو وسابو بلطجية النظام يدخلو عليهم الميدان

- طنطاوي حبيب مبارك وصاحبه الروح بالروح اكتر من 20 سنه وكل قيادات الجيش اللى معينهم مبارك

-بعد تخلى مبارك عن منصبه لما ضربو المتظاهرين عشان كانو بيطالبو برحيل شفيق .. وهما كانو بيحموه عشان بيحمو الفساد
وشفيق لسه متحاكمش لحد دلوقت بسبب اللى عمله
-فى 9 ابريل لما ضربو الشباب فى التحرير ووفاة على ماهر 19 سنه والقبض على الظباط اللى تمردو

-سكوتهم على مبارك اكتر من شهرين خلوه يلم ورقه ويهرب فلوسه ويمسح اثار فساده
وهو نفس التباطؤ اللى عملوه مع سرور والشريف وعزمي

-في الاستفتاء لما كانو مايلين لنعم للتعديلات الدستورية وكلام ممدوح شاهين،الشعب قال نعم للمجلس العسكري

-وقفتهم يتفرجو على كنيسة امبابه وهى بتولع والاستباكات بين المسلمين والمسيحيين عشان هما عايزين الفتنة

-مبارك اللي متسجنش لحد دلوقت وعايش حياته في شرم الشيخ على حسابنا

-المحاكمات العسكرية فى حق المدنيين وخاصة اللى كانو عند السفارة .. ودفاعهم المستميت عن سفارة اسرائيل يوم الزحف
-واخيرا واللى اكيد مش هيبقى اخر حاجه لو سكتنا هى قبولهم بالمصالحة مع سوزان مبارك

ان الجيش مش هو المجلس ولازم الناس تعرف كده .. المجلس قيادات ولائها لمبارك .. الجيش انا وانت واخواتنا

تفتكر هستنى ايه بعد كل ده
انا لازم انزل يوم 27 واقول لا .. انا عايز مجلس رئاسي مدني

يسقط يسقط حكم العسكر
......................................................................

(ب)

انا ضد مجلس رئاسي مدني .. وشايف ان مصلحتنا حتى الانتخابات فى سبتمبر ان المجلس عسكري يكمل

اولاً المجلس العسكري مش وحش زى مانت متخيل

وفي نقط مينفعش تنساها

 ان اجتماعهم يوم الخميس 10 فبراير واصدارهم اول بيان بدون القائد الاعلى هو انقلاب عسكري

يعني وهما قاعدين فى اجتماعهم اليوم ده لو كان دخل الحرس الجمهوري صفاهم كانو بقو شوية خونة وتم اعدامهم

وده الكلام اللى اكده عبد العزيز الجندي وزير العدل الحالى ان مبارك تم عزلة ومتخلاش عن السلطة بارادتة

فالناس دي خدت جنب الثورة فعلا

ومن كلام محمود سعد .. وعن اللى اتقال عن عبد اللطيف المناوي ان مبارك عزل طنطاوي فى يوم 10 فبراير لكن المناوي مذاعش البيان وبعته للجيش وده اللى خلى الجيش ميحاكمهوش وسابه يسافر

ان قيادات في الجيش كانت ضد التوريث من قبل اصلاً الثورة متقوم وده اكدته وثائق ويكليكس

حتى لو كنت شايفهم ضربونا عشان شفيق يوم 26 فبراير .. فلو تفتكر انهم لما قعدو مع البرادعي وعدد من الشخصيات السياسيه-

 سألو مين الشخص اللى الشباب عايزينه يشكل الحكومه ولما عرض عليهم الاسماء اختارو اول اسم اقترحه شباب الثورة وهو عصام شرف
فى يوم تكليف عصام شرف بتشكيل الحكومة أعلن البرادعي ان الثورة انتهت وحان وقت البناء
وان نظام مبارك خلاص سقط واحنا على الطريق السليم

-ان الجيش لو عايز ميحاكمش مبارك مكانش حطه تحت الاقامة الجبرية
أيوه بالعقل كده .. فاكر لما كانت بتطلع تقارير عن ان مبارك راح تبوك
وانه هرب وكلنا سكتنا واغلبنا اعتقد فعلاً انه هرب

لو كان المجلس ليه نيه لحمايته مكانش قعده هو وولاده تحت الإقامة الجبرية فى شرم الشيخ

 

لو كان المجلس فعلاً متواطئ وعايز يرجعلك الدستور القديم فكان ممكن يرجعهولك بعد الاستفتاء
لما الشعب 77% منه قالو نعم على التعديلات
يعني لو كانو فعلا عايزين يحافظو على نظام مبارك كانو قالو ادى اللى الشعب اختاره وجابولنا الدستور القديم
وساعتها اللى هيفتح بوقه او يعترض كان هيتفشخ باسم راي الاغلبية والديموقراطيه وكان هيبقى معاهم حق
لكن مع ذلك عملو اعلان دستوري ومرجعوش الدستور القديم رغم انه كان بايديهم

انت شايف ان المحاكمات العسكرية ضد الشباب عند السفارة كان مبالغ فيها

ولكن انت بتتعامل مع المؤسسه العسكريه .. هنا مفيش هزار

والاحكام كلها كانت مع ايقاف التنفيذ

هل الجيش حاجه والمجلس حاجه؟

اختلف معاك .. لان المجلس 18 قيادة بتمثل مختلف قطاعات الجيش

لو قولت 2  او 3  او 4 فاسدين لكن متقدرش تقول كله مش بيعبر عن الجيش

.............................................

دى كانت النقط الأساسية في الحوار بين الصديقين
ويمكن فى اكتر بس مش عاوز اكتب اكتر من كده
انا معنديش وقت اكتب .. وانت معندكش وقت تقرء
ده عصر السرعة

"المجلس ليس ثوريا، يقود شعب ثائر، بسبب ان الثورة لم يكن لها قيادة منذ البداية، ازمتنا فرق سرعات،العقليات مختلفة وليس النوايا من وجهة نظري" أحمد رجب

يمكن الجملة دي بتلخص كتير

وحط عليها ان فعلاً راي الشارع هيكون ضد اى حد يطالب بمجلس رئاسي مدني لأنهم مش بيثقو في اي شخصية سياسية

ولأن كل الشخصيات السياسيه اللى نزلت الشارع البعض هاجمها بشراسه زي البرادعي وصباحي وحتى عمرو موسى
يعني اى مجلس رئاسي .. هنلاقيه كل اسبوع في التحرير مليونية لإسقاط واحد فيهم

إلا بقى لو عملت مجلس رئاسي فيه اكتر من 100 شخصيه عشان يبقى مثلت كل التيارات وده هيبقى سيرك مش مجلس

نقطة مهمة تانيه هي هيبة الجيش
|ممكن تشوف ان الجيش اهم حاجه هيبته برا مصر وسط جيوش المنطقة لكن بالنسبالي هيبتة جوا مصر دلوقت أهم

شوية سلفيين كاتبين ان اللى هينزلو يوم 27 هما العلمانيين والليبراليين والكفرة والملحدين

 انا وجود الجيش فى الحكم بالنسبالي هو العامل الاهم للسيطره على قوى الظلام دي اللى ممكن تثير الشارع وتعمل مظاهرات ضد اى شخصية مدنية فى مجلس رئاسي واكيد ان كلهم هيكون ارائهم ضد السلفيين وحركاتهم

وان اراء النشطاء واعتقادهم انهم رايهم من رأي الشارع اتضربت فى العديد من المواقف زي الاستفتاء
فمتقولش مجلس رئاسي مش هيوافق عليه غير اقل من اللى قالو لا وانا منهم

وفي النهاية انا بقول اني نازل يوم 27
عشان ازق المجلس واخليه يتحرك واثبت ان الثوره مستمره

لكن مش علشان اقوله أرحل

وبرفض مصطلح الثورة التانيه
هي الثوره  مستمره

السماح بتصويت ظباط الشرطة..ده معانا ولا ضدنا

بسم الله الرحمن الرحيم

هبدء بحكاية صغيره

من اكتر الناس اللى كافحت معانا من اجل التغيير واتشرفت انه كان معايا يوم 25 المقدم محمد محفوظ

اللى هو دلوقتي فى ائتلاف ظباط الشرطة وبيحاولو يصلحو منظومة الشرطة

المقدم محمد محفوظ كان مسئول العلاقات العامة بمكتب مدير امن اسكندريه..وتم فصله من عمله في 2009 عشان رفع قضية

القضيه كانت للسماح لظباط الشرطه بالتصويت فى انتخابات الرئاسة..عارفين ليه اتفصل؟ 

عشان كانو شايفين ان الظابط لازم يبقى جزء من النظام

مينفعش الظابط يبقى ليه صوت او يصوت لأي مرشح

كون ان الشرطه مبيصوتوش فى الانتخابات ده بيرسخ جواهم انهم جزء من النظام

دورهم الدفاع عنه مش الدفاع عن الشعب

تفتكرو لو ظابط انتخب د-أيمن نور في 2005 كان هيدافع عن النظام

 او يطارد واحد فى حزب او حركة بيطالب بالديمقراطية

سؤال كمان

هل لو تصويت الشرطه كان بيصب فى مصلحة النظام..كان مبارك وكلابه هيمنعوهم من التصويت طول فترة حكمه؟؟ ويفصلو اللى يطلب ذلك؟؟

معظم الدول الديمقراطيه في العالم الظباط ليهم حق التصويت عادي

اللى هو حق كفلة الدستور اصلا

لكن تم منع رجال الشرطة منه في قانون الحقوق السياسية

وده زي مقولت عشان يضمنو ان ولائهم للنظام وللرئيس فقط

طب هل كونهم يصوتو مش هياثر في مسار العملية الانتخابية

لا

لأن الشرطة بتأمن المقار فقط...الاشراف على الانتخابات من الهيئة القضائية

ورجال القضاء مالهمش حق التصويت

القرار كان تعديل قانون مباشرة الحقوق السياسية

والسماح بالتصويت لرجال الشرطة والجيش والمصريين بالخارج

ليه بقى الناس أغلبها مش عاجبها القرار

مش عارف

بس أعتقد عشان احنا بنكره الشرطه وشايفينهم ولاد كلب فلازم لو صوتو هيعملولنا كارثة

عشان كده معظمنا خد موقف سلبي من القرار من غير ميفكر كويس فيه

ده غير الهجوم الشنيع على شرف اللى احنا مشوفناش منه غير كل خير

المقدم محمد محفوظ معاهم
لحد7-2009

المقدم محمد محفوظ معانا
في حزب الجبهة
يوم 7 اكتوبر 2010

وفي النهايه اسيبكو مع الخبر ده

 والبيان ده

................................................
تحديث

يا فرحة ما تمت...ممدوح شاهين لسه نافي الخبر على اون تي في

الكنيسة والبابا ومصر

ده كان من اكتر الموضوعات الشائكه في مصر زى كامب ديفيد وعلاقتنا باسرائيل كده

بس بعد الثوره

ليس هناك خطوط حمراء ولازم نقف قدام المرايه ونواجه مشاكلنا بجد

عن علاقة الكنيسه بمصر

اولا انا شخص مسلم ليبرالي مؤمن ان كل المواطنين متساويين

مفيش فرق بيني وبين اي مصري تاني سواء كان مسيحي او ملحد او يهودي او اى ديانه يحبها

وعشان كده بنظر للامور من الخارج

مشكلة الكنيسه فى وجهة نظري انها بتعتبر نفسها كيان مستقل رئيسه البابا وهو سفيرها لمصر

واغلبية المسيحيين بتتعامل معاها بالمبدء ده

يعني علاقتهم ورئيس جمهوريتهم هو البابا وخاصة في الامور السياسيه

واي حاجه البابا هو اللى بيتولى تخليصها مع الحكومه او مع الرئيس المخلوع

مع إشعارهم بصفه دائمه انهم مالهمش غير الكنيسه وان الرئيس المخلوع هو اللى كان بيحميهم

لكن الاذكياء مخدوش بالهم ان الفقر مش بيفرق بين جيب مسلم وجيب مسيحي

وان الجوع لما بيقرص مش بياخد باله من دي بطن مسلم ولا مسيحي

ولما بتاخد على قفاك برا ومحدش يقولك انت فين وتروح السفاره متفرقش معاهم انت مسلم ولا مسيحي

عشان كده استجاب لدعوة التغيير و لثورة 25 عدد كبير منهم

رغم ان الكنيسه دعت الشباب لعدم الخروج وأيدت نظام مبارك (زي الأزهر )

لكني فرحت بكل واحد بجد خرج

لان ده كان بيتحدى الكنيسه قبل مبيتحدى النظام

زينا لما خرجنا تحدياً لشيوخ "لا الخروج على الحاكم"قبل منتحدى النظام

لكن هما كانو افضل لان كل واحد كان بيتحدى الكنيسه اللى مفهماه ان من غيرها يضيع

وعشان كده له فاكر قعدتي فى الزنازنه مع جون وبيتر

الزنزانه في يوم 26 مفرقتش بين مسلم ومسيحي

فى الوقت الحالي انا يوم عن يوم بانبسط

بسبب ان كل يوم بيزيد وعي النا وابتدى كتير منهم يفهم انه جزء من الدوله

وانها ملكنا كلنا

وهو زيه زيي ... مصر اللى بتحميه واللى هتحميه مش الكنيسه

عشان كده انا مبسوط اوي من انشاء نجيب ساويرس لحزب سياسي

ومن بداية خروج المسيحيين من عباءة الكنيسه الى نظام حزبي قوي

زي فرحتي بخروج كتير من الشباب من عباءة الشيوخ المتحولين وانضمامهم لاحزاب

الحل دلوقت اننا نعرف ان مصر بتاعتنا مسلمين ومسيحيين

ولو هنفضل منتمين لهياكل دينيه امن الدوله المنحل اخترقها للنخاع يبقى هنخسر كتير

وانا بقول لكل اصحابي واخواتي المسيحيين و المسلمين

كل شخص هيختار يقفل على نفسه الدايره

عمره مهيحس ان دي بلده وهيعمل تربه احسن للفتنه تعيش فيها

مصر بلدنا وكلنا شوفنا موقف البابا وموقف شيخ الازهر من الثوره

وموقفهم بعدها..كانو لعبة فى أيدي النظام

كنا فى التحرير من غيرهم..واحنا اللي حمينا بعض

خلو الصوره دي دائماً في ذهنكم

ودي انا اللي مصورها بنفسي في الميدان

البرادعي والإخوان

تفتكرو الاخوان هيأيدو مين فى انتخابات الرئاسه؟؟

سؤال تقريبا بيتسال كل ساعه وكل يوم

خلونا نتفق بس الاول حتى ان كنت من اشد كارهي الاخوان فانت برده عارف الفرق اللى هيعملوه لو أيدو مرشح بعينه

خاصه انهم اكتر تيار سياسي ليه تواجد فى الشارع
وبيعرف يتكلم وفاهم لغة المواطن البسيط

نرجع بقى للسؤال

الاخوان هيأيدو مين..بالاصح شايفين مصلحتهم مع مين اكتر؟؟

لو بصينا على الاسماء المطروحه بقوه دلوقت للرئاسه

وان كلهم من تيارات لا تنتمي للاخوان

عدا عبد المنعم ابو الفتوح اللى كان جزء منهم وانشق

فاحنا هنلاقي الاتي .. الإخوان اولاً صرحو انهم مالهمش مرشح رئاسي

ثانيا هيصرحو انهم لن يدعمو شخص بعينه فى الانتخابات

كل ده (رسميا)..إنما على الارض نبقى ساذجين لو افتكرنا ان الاخوان هيقعدو فى مقراتهم ويسيبو اللى ينجح ينجح

بشوية منطق هنلاقي ان الاخوان لازم هيأيدو مرشح يضمنلهم المكاسب اللى حصلو عليها من بداية الثوره ولحد دلوقت واللى جايه فى الطريق وخاصة البرلمان

يعني هيدورو على واحد بيثقو فيه..واحد عارفين انه لو مسك الحكم مش هيقلب الاعلام ضدهم ويشوه صورتهم ولا يبدء يحاربهم ويشوط فيهم زي النظام السابق

طبعا بعد الثوره كل القوى السياسيه بقت تحترم الاخوان وكل مرشح رئاسي بقى بيعظمهم لما تيجي سيرتهم

لكن معتقدش انهم برياله

وعشان كده دي اول حاجه بتخليني اعتقد فى ميلهم للبرادعي

لاننا لو رجعنا بالزمن شويه ولقينا ان من اكتر من سنه اول واحد قال ان مينفعش الاخوان يبقو جماعه محظوره وهما ليهم 20% من البرلمان

والا يبقى انت بتحظر حوالى خمس الشعب المصري..ده كلام شخص فاهم يعني ايه ديمقراطيه

ده كلام البرادعي

لما رجع البرادعي وبدءت القوى الوطنيه تتوحد وعملت الجمعيه الوطنيه للتغيير

الاخوان انضمو ليها .. فى اول خطوه فى تاريخهم ينضمو فيها لكيان اكبر عشان هدف موحد

وجولات البرادعي كان بيشارك فيها الاخوان بقوه

تأييد الاخوان للبرادعي في الفيوم ..ابريل 2010

"وجلس بجوار البرادعي على المنصة في مؤتمر جماهيري بعد صلاة الجمعة عضو مجلس الشعب مصطفى عوض الله المنتمي لجماعة الإخوان، والعضو القيادي في الجماعة الأحمدي قاسم"

وكان فى التاسيس بتعها سعد الكتاتني رئيس الكتله البرلمانيه للاخوان اكتر من 80 نائب بمجلس الشعب

ده قبل انتخابات 2010

بعدها اول مره واحد يحترمهم ويروح لحد عندهم

اللى قال فيه انهم اكبر حزب لاحظو ان الكلام ده قبل الثوره بسنه

ايام مكان الكل بيضربهم بالجزمه واحد بس كان معاهم

د-محمد البرادعي فى مؤتمر مع الكتاتني مره تانيه

يونيو 2010

المؤتمر الهام اللى بعده بدء الاخوان جمع توقيعات على بيان التغيير

ولو تفتكرو الفرق اللى عملوه فى عدد التوقيعات على بيان التغيير

اللى خلاه يعدى مليون توقيع

كفايه كده فى القديم...ندخل على ثورة 25

عوده البرادعي يوم 27 الخميس للمشاركه فى جمعة الغضب

كان فى انتظاره بفيلته

عصام العريان وسعد الكتاتني

الموضوع ليه بقيه وكل دي توقعات وتخمينات انما الواحد شاف عدة دلائل

البرادعي والاخوان ..تحالف أسسه النظام فأسقطه

غلاف جريدة المصور

Freedom

الحريه

احساس محدش يقدر يتكلم عليه غير لما يفقده

  حسيت معنى الكلمه دي فى فجر 27 يناير

بعد ليله منمتش فيها بسبب برودة الجو وخشونة ارض الزنزانه

وولاد الكلب مشغلين المروحه فى عز يناير 

وطول الليل اروح اقف جنب الباب الحديد

مستني حد ييجي يقول هتخرجو دلوقت ومستني الصبح يطلع يمكن ادفا

وبفكر يا ترى ماما عامله ايه دلوقت؟؟ :(

ولما الفجر طلع والنور بدء يظهر

بصيت من ورا القضبان لفوق

عشان كنا محبوسين تحت الأرض وعلشان تشوف من اشباك لازم توطي وتبص لفوق

لما ساعتها بصيت على السما وشميت هوا الفجر

ساعتها بس عرفت معنى الحريه

وكان واقف جنبي جون ساعتها وقولتله انا اول مره اشوف السما حلوه كدا

^_^

New Day Has Come

ده كان عنوان بوست ليا ع المدونه من من سنه تقريبا

اول مالبرادعي احيا الأمل فيا

بس لازم أعيده تاني دلوقت

الأرض دي أرضي

جمله ياما سمعتها

بس الحقيقه معرفتش معناها غير يوم 25 يناير الساعة 5 المغرب

تحديدا لما مشينا فى شارع جمال عبدالناصر وحسيت ان الشارع ده ملكي

انا عمري محسيت ان البلد دي بتاعتي بس اليوم ده لما مشينا فى الشارع واخدينه كله 

اكتر من 10000 مصري حر

ولما شوفنا الامن المركزي بيهرب قدامنا واحنا بنجري وراه

مشينا فى الشارع لحد سيدي جابر وانا حاسس ان كل جزء فى الشارع ده بتاعي

شبر شبر ..دار دار ..زنقه زنقه

 "اقتباس من ابن المجنونه"

من يوم 25 وانا حاسس ان كل جزء فى البلد بتاعي

انا دي بلدي بجد ولازم اموت دفاعا عنها

امبارح كنت فى مكتبه اسكندريه

المفروض وانا خارج باللاب توب بيكون في واحد يشوف السيريال نمبر على الكارنيه وعلى اللاب عشان محدش يسرق واحد بتاع حد

خرجت من الباب وملقتش حد بيفتش قمت راجع تاني لحد الامن وخليت الراجل يدور على الموظف ده ملقهوش

قولتله معلش هنتعبك بس اقف لحد المكتبه متقفل (كان فاضل حوالي نص ساعه وتقفل)وفعلا الراجل ابتسم ووقف يفتش رغم انه مش شغلته

واحد ماشي بعربيته وحدف كيس من العربيه وهو ماشي

روحت لنص الشارع وخدت الكيس رميته فى الزباله

انا مش بطل ولا بستعرض.. كلنا بنعمل الكلام ده من يوم 25

دى مواقف بتعبر بس

مفيش رجوع وسلبيه تاني

اه .. الثوره مغيرتش ناس كتير

بس اعتقد ان في 10% من الشعب اتغير والباقي تدريجيا هيتغير

لما يشوف الايجابيين دول وسطه وهيزيدو يوم بعد يوم

مصر بتتولد من جديد

دفاعاً عن الدين

بسم الله الرحمن الرحيم

امبارح شوفت فيديو غزوة الصناديق لمحمد حسين يعقوب

ومش هتكلم عنه لان خلاص كل الناس اتكلمت عنه

 نذكر بس انه شايف ان الناس قالت نعم للدين...على اساس ان اللى اختار لا كانو بيقولو لا للدين.

وامبارح برده شوفت القذافي بيموت فى شعبه لحد مالناس بقت بتبوس رجل الدول الغربيه انها تتدخل
وتنقذ الشعب الليبي من المجنون الدموي ده.

ويطلع ع التلفزيون الليبي يقول يحيا الاسلام..يحيا الاسلام

انا بواجه الاستعمار الصليبي

امبارح برده شوفت القرضاوي بيتكلم عن القذافي والعمليات العسكريه فى ليبيا وهو كان كفره هو وجدى غنيم قبل كده واهدرو دمه

باسم الاسلام

وبرده شوفت النهارده على التلفزيون الليبي شيخ طلع شبشب القرضاوي وكفره

وقال انه افتى بقتل المدنيين اللليبيين الابرياء باسم الحمله الصليبيه

والشيخ قال ايات فى القران واستخدم الدين فى مهاجمة القرضاوي

من كام يوم شوفت عبود الزمر بيتحدث على العربيه وقال انه مش ندمان على قتل السادات وطالب بوجود لجان متخصصه للتكفير

وتحدث عن رؤيته للاسلام والدوله وقال انها رؤيه معتدله!!

ده غير طبعا رؤية الاخوان ورؤية الجهاد ورؤيه الصوفيين والجمعيه الشرعيه

باختصار كل واحد شايف الاسلام من وجهة نظره

وكل واحد شايف انه كده بينصر الدين

يعني القذافى بيقتل شعبه وبيقول انا كده بنصر الاسلام

والقرضاوي بيكفر القذافي ويامر بقتله وهو كده بينصر الاسلام

انا بقى بنصر الدين

ايوه بنصر الدين بالدعوه لليبراليه وفصل الدين عن السلطه ولكن ليس فصله عن الحياه

انا شايف ان احلى مناخ الدين ينتشر فيه هو مناخ الحريه

ده الشئ الوحيد اللى يخلى الناس تبص على الاسلام وتقتنع بيه 

وشايفين تركيا مثلا

حزب العداله والتنميه ورجب طيب اردوغان

وازاى ان حزب ذو مرجعيه اسلاميه قدر يقود البلاد للتقدم ويفرض على كل الناس غير المسلمين قبل المسلمين احترامه

وازاى انه الدوله الوحيد اللى تصدت لاسرائيل وفكت حصار غزه باسطول الحريه
والعرب المسلمين قعدو يحلفو بشجاعته ويلعنو سلسفيل ابو حكامهم ودولهم ام الماده التانيه

تخيل معايا واحد اوروبي او امريكي او افريقي او اسيوي

واغلبهم ملحدين

فكر فى الاديان وبدء يقرء

ولقى عنده نموذجين نموذج تركيا

الدوله العلمانيه

ونموذج السعوديه

الدوله الدينيه

(اللى الدين فيها على مزاج الملك)

تفتكر انهى نموذج يقنعه اكتر؟؟

ادخال الدين فى السياسه هو اكتر شئ بيسيئ للدين

لانه بيتم استغلاله كل واحد ووجهة نظره وانا قولت نموذج القذافي والقرضاوي موقفين عكسيين تماما

والاتنين وياللعجب بينصرو الدين !!

وساعتها الدين هو اللى بيتحاكم

يمكن عشان كده بحب الاخوان لانى واثق انهم لو مسكو الحكم هيلجأو للنموذج التركي
ومش هيغامرو ويعملو زى ايران مثلا

انا ليبرالي وشايف ان دى افضل طريقه للدين

من حقك تبقى متدين لكن متفرضش رايك على الناس او تستغل الدين فى السياسه

وانا بعمل كده دفاعا عن الاساءه للاسلام من قبل الاشياء اللى بتفسر الدين على هواها وتسخره لخدمتها ومصالحها الشخصيه

حـــــــــريــــــــــــــه

Tanks in the streets

حازم صاحبي (اللي فى الصوره جنبي ده)..ا

اخوه بيحكيله انه نام يوم الخميس 27 بالليل وصحى يوم السبت 29 نازل الشغل لقى دبابات فى الشارع

دي مش نكته دي حقيقه

^_^

 

░░░███████ ]▄▄▄▄▄▄▄▄▃░ ▒▓▓█D
▂▄▅█████████▅▄▃▂
I███████████████████].
◥⊙▲⊙▲⊙▲⊙▲⊙▲⊙▲⊙◤..

  مصر

لما ابوك يكلمك من السعوديه يقولك طبعا انت قاعد فى البيت عشان حظر التجول

تقوله حظر التجول ده عليكم انتم ..انا بكلمك من فوق الدبابه يا عم الحج

The butterfly effect

The butterfly effect

ان اهتزاز اجنحه الفراشه فى مكان ما...قد يسبب اعصارا فى النصف الاخر من العالم

!!!!!!

المشهد الاول

(بلده صغيره تسمى سيدي بوزيد-تونس)

عامل بلديه وزملائه يأخذون عربه لبيع الخضار بالسوق من شاب فقير يشعر بالغضب

فقد الشعور بالامل منذ زمن

المشهد الثانى

(مطار الحبيب بو رقيبه-تونس)

رئيس يشعر بالعجز والخوف.. يلقى نظره خلفه ثم يكمل صعوده على سلم الطائره مغادرا بلاده بعد ان حكمها اكثر من 24 عاما

المشهد الثالث

(الاسكندريه-مصر)

شاب يغنى اهو ده اللى صار فى الزنزانه بعد ان تم القبض عليه عقب مظاهرات تهز البلاد

يشوب الحزن نبره صوته رغم قوتها

المشهد الرابع

(ميدان التحرير-مصر)

طفله عينيها مملوئه بالبراءه تحتفل عند سماعها خبر تنحي الرئيس المصري بعد وصول المتظاهرين الى قصره

المشهد الخامس

(قرية الدية-البحرين)

شيخ هرم يمشي فى جنازه

هى جنازه اول قتيل باحداث تهز البلاد للمطالبه بالاصلاح ينظر الى الشباب من حوله ويشعر بالشفقه عليهم وهو يسمع صوت سيارات الشرطه قادمه من بعيد

المشهد السادس

(عدن-اليمن)

شاب مفعم بالقوه،اسمر اللون يشعر بالامل يخرج مع اخيه واقرانهم ، يملئون الشوارع مطالبين بسقوط رئيس يحكمهم اكثر من 33 عاما

المشهد السابع

(البيضاء-ليبيا)

شاب فى العشرينات يخرج ليطالب بابسط حقوقه فى الحياه من حاكم ظالم يحكم منذ اكثر من 42 عاما

المشهد الثامن

(مطار مالطا الدولي)

قائد طائره حربيه يهبط بمطار مالطا..لم يستطع ان يقصف المتظاهرين ضد الطاغيه وهو يعلم ان اخوته وابناء عمومته وسطهم

المشهد التاسع

(بكين-الصين)

شابه قصيره..تحمل علم بلادها وتتجه لاحد اكبر الميادين لتعبر عن احتجاجها على قوى القمع وكتم صوت الشباب ببلدها

اعصار جبار يجتاح العالم شرقا وغربا

لكن هل يعلم كل من يرى هذا الاعصار الهائل انه نشء من اجنحه فراشه صغيره تخفق فى الهواء؟؟

اهداء لمحمد بوعزيزي

 "مسافر يا أمي، سامحيني، ما يفيد ملام، ضايع في طريق ماهو بإيديا"

و عن البرادعى سأتحدث

اعتقد مش محتاج اقول مين هو البرادعى

اصلى هقول ايه ولا ايه

هذا الرجل فخر لكل مصرى

تم تكريمه فى العالم كله مش محتاج شهره كمالبعض
لما اخد اجايزه نوبل اتبرع بيها لولاد بلده مش محتاج فلوس كمالبعض

رجع عشان عنده حلم
واللى بيشاركه فى الحلم والرؤيه بيتحرك معاه

سواء اتفقنا او اختلفنا عليه ما زال هذا الرمز فخر لكل مصرى

البرادعى كمان وكمان

انا لسه متكلمتش مش عارف يعنى اتكلم عن تكريمه فى انحاء العالم

ده انا محتاج مدونه لوحدها وخاصه ان فى صور رهيبه محتاجه البومات

طب نتكلم عن رؤيته

برده صعب انى الم كلامه فى جملتين انا هسيبكو مع الفيديو ده

ده فيديو قديم من قبل ميرجع مصر فى فبراير



اللى حكم ع البرادعى من غير ميقرى كويس محتاج يراجع نفسه تانى

البرادعى عنده حلم
مصر تستحق اكتر من اللى هيا فيه

منذ عودته والبرادعى ليه نهج معين
بيختلف مع اسلوب كثير من القوى السياسيه دلوقت

نهج البرادعى ليه نظام اكتر 
ورغم ان المفروض اننا كلنا محاربين ضد الطغيان انما بعض اللى المفروض اننا فى صف واحد ضد الظلم هما اكتر ناس هجوما عليه

اصل فى ناس بتعارض وتناضل من اجل النضال 
ولما بيتسحلو ويرجعو يقولو اتسحلنا وهما فرحانين

وفى ناس زي البرادعى
انا ليا هدف انا مش نازل عشان اتسحل

احنا لما هننزل هننزل مره واحده هتكون الاولى والاخيره
لاننا عارفين انها هتكون نهايه النظام

الحركه مش وقتها دلوقت
واى تحرك دلوقت هيكون مصيره الفشل المريع هيموت الحلم لو عشرات الالاف بس هما اللى اتحركو عشان يحققوه

هدفنا اننا نكون مايسمى بالكتله الحرجه اللى نقدر بيها نضغط ع النظام
وساعتها لو مستجابش الناس دى هتنزل الشارع ولازم متكونش اقل من ربع مليون

عدد يقدر يغير بلد وميتعملش معاه حاجه

ده لينك صفحه البرادعى فى الويكي لمزيد من المعلومات وفى منها كتير كتير 

ودى قناه البرادعى على يوتيوب لو عايز تعرف رؤيته اكتر


وربنا يوفقنا للى فيه الخير لبلدنا عشان تبقى احسن
 

فطار شباب الحمله مع البرادعى

 "انا سعيد انى بجتمع بيكو النهارده رغما عن قانون الطوارئ"

"احنا مش هننزل الشارع غير مره واحده هتكون الاولى والاخيره لاننا هنبقى عارفين انها نهايه النظام"

دول كانو اقوى كلمتين اتقالو امبارح فى فطار د.محمد البرادعى

واللى حضرته امبارح واتبسطت جدا

واللى احلى حاجه انى قابلت شباب كتير فيه

احسن شباب مصر

يارب وفقنا للى فيه الخير

وساعدنا فى تحقيق حلمنا

سؤالين

بصو فى السريع كده سؤالين ونفسي حد يجاوبنى:

1- ايه موقف شيوخ الفضائيات بتوع طاطى راسك للحاكم والمظاهرات حرام من قضيه كاميليا شحاته؟؟

 محمد حسان واللى زيه لما قالو على اضراب 6 ابريل حرام وعلى المظاهرات اعمال عنف بوعظ من الحكومه

ايه موقفهم من اختطاف واحده اسلمت؟؟

هل هيعرفو ان البلد مبقاش فيها قانون وان اللى يصوت فى الحكومه بياخد حقه ولا هيفضلو يطاطو للأبد!!!!!

كلمه واحده افتكرتها:وااااااااااااااااا اسلاماه

 

2-عمليه للمقاومه فى فلسطين امبارح وواحده النهارده قبل انطلاق المفاوضات؟؟

فى عز اسرائيل مهى محتاجه انهى تبين قبل المفاوضات ان الفلسطينين ولاد كلب وهيا اللى كويسه

يقوم فصائل المقاومه اللى نايمه بقالها فتره تعمل عمليتين فى ظرف يومين..علل؟؟!!!

الغريب ان ناس كتير اعرفهم وبيفهمو وهللو للعمليتين

انا كنت على طول باحتار فى موضوع المقاومه ده..

هل العمليات ضد اسرائيل غباء طالما ميزان القوه مش فى صالحنا،لانها بترد بعنف وقتل فى المدنيين العزل الفلسطينيين

ولا لا لازم نفضل نقاوم عشان مننامش ويضيع الحق

بس لحيره دلوقت زادت بالسؤال التانى ده

طبعا مش هسأل على موضوع جمال اللى ابوه خده على رجله فى اخر زياره لامريكا ده..ده هنعرفه بمرور الايام

بس بالله عليكو حد يجاوبلى ع السؤالين اللى فاتو دول.

رسالة الى عبد المنعم رياض

لو يُقتَلونَ مثلما قُتلتْ

لو يعرفونَ أن يموتوا.. مثلما فعلتْ

لو مدمنو الكلامِ في بلادنا

...قد بذلوا نصفَ الذي بذلتْ

لو أنهم من خلفِ طاولاتهمْ

قد خرجوا.. كما خرجتَ أنتْ..

واحترقوا في لهبِ المجدِ، كما احترقتْ

لم يسقطِ المسيحُ مذبوحاً على ترابِ الناصرهْ

ولا استُبيحتْ تغلبٌ

وانكسرَ المناذرهْ…

لو قرأوا – يا سيّدي القائدَ – ما كتبتْ

لكنَّ من عرفتهمْ..

ظلّوا على الحالِ الذي عرفتْ..

يدخّنون، يسكرونَ، يقتلونَ الوقتْ

ويطعمونَ الشعبَ أوراقَ البلاغاتِ كما علِمتْ

وبعضهمْ.. يغوصُ في وحولهِ..

وبعضهمْ..

يغصُّ في بترولهِ..

وبعضهمْ..

قد أغلقَ البابَ على حريمهِ..

ومنتهى نضالهِ..

جاريةٌ في التختْ..

يا أشرفَ القتلى، على أجفاننا أزهرتْ

الخطوةُ الأولى إلى تحريرنا..

أنتَ بها بدأتْ..

يا أيّها الغارقُ في دمائهِ

جميعهم قد كذبوا.. وأنتَ قد صدقتْ

جميعهم قد هُزموا..

ووحدكَ انتصرتْ

نزار قباني
1971

لسه فيكى خير يا بلدى

انا حكيت على الجولات دى كتير قبل كده مش عايز اصدعكو تانى

وكل الجولات اللى فاتت موجوده فى المدونه

كل مره زى اللى قبلها بس المره دى هضيف الجديد على طول

الجوله اول امبارح كانت فى بحرى

وهى منطقه الى حد ما فقيره ونسبه التعليم فيها اقل بالنسبه الى المناطق الاخرى فى اسكندريه

طبعا الاقبال كان ضعيف وده رجعنى تانى لنقطه ان الناس بتعانى بس برده بتخاف تشتكى وان الجهل هو عدونا الاول قبل الحزب الوطنى  والتزوير والفساد

الموقف اللى استوقفنى كثيرا (حلوه استوقفنى دى)

لما غلب حمارى مع الناس

وقفنا مشلولين وعاجزين عن الفهم وسط كل الناس الميته دى (على رأى الرائع احمد خالد توفيق) مئات بل والوف بل ملايين السيدات حباره--راجع مقال السيد حباره

نرجع تانى للموقف

وقفنا مشلولين فبصيت ع البحر لقيت واحد قاعد جنب ابوه واخته وامه وفاتح اللاب توب وبيكتب ومركز

قولت لحازم صاحبى وزميلى الانتيخ

يلا يا حازم الراجل ده شكله متعلم وهيتجاوب معانا

لسه بقوله السلام عليكم ممكن اعطل حضرتك خمس دقايق

 لقيته رد عليا وبجفاء شديد: لا امشى من هنا

انا استغربت جدا،هو برده بصلى وقالى هو انتو مش من الحزب الوطنى..قولتله لا واديته البيان قولتله بقى الحزب الوطنى هيلم توقيعات زى دى وكمان لابسلك تى شيرت البرادعي (ساحره ولا مش ساحره :D)

امه واخته بصولى وضحكو 

فقالى بحسبك من حمله جمال مبارك،سيبلى الورق وانا هقراه سيبتله اربع ورقات

ورحت اكلم شباب تانيين معديين بعد عشر دقايق لقيت حازم بيدينى اربع ورقات بيقولى خد الراجل وعيلته وقعوا

متتخيلوش كميه الفرح اللى حسيت بيها

وقولت رغم انى ساعات بقول الناس دي متستاهلش بس مواقف زى ديه بتدى الواحد دفعة للامام

لسه فيكى خير يا بلدى 

صور الجوله على الفيس بوك

كفايه ..2005 -2011

                                    الحركه المصريه من اجل التغيير (كفايه)

اشهر حركه احتجاجيه فى الخمس سنين اللى فاتو

وام كل الحركات اللى قامت بعدها

بدايه... انا للاسف مشتركتش فى اى فعاليه من فعاليات كفايه فى عزها 2004 و 2005

ايامها كنت صغير مبفهمش،وكمان كان عندى امتحانات الثانويه العامه والنت مكتش انتشر زى دلوقت

بس رغم كده كنت متابع اخبارها كويس

وفرحت جدا لما حسيت ان الناس عايزه تغير الوضع وابتدت تثور

وكنت ببص لكل اعضاء الحركه على انهم مناضلين نفسي اشوف حد فيهم عشان اسلم عليه

كان ايامها لسه برده الصحافه المستقله بادئه

واكتر صحيفه ارتبطت فى ذهنى بالفتره دى جريده الفجر

اخبار الحركه كانت ماليه الجرايد و الصور كانت تحرك المشاعر وانا لسه فاكر صور مظاهره ضريح سعد زغلول والشموع

المظاهره اللى حسيت انها ممكن تعمل ثوره 

بس للاسف انهارت الحركه واختفت بعدها

يمكن عشان عقدنا عليها الكثير من الامال واستنينا كالعاده حد يغيرلنا واحنا قاعدين فى البيت

المهم 

انا من كام شهر كنت عبيط

على رأى هشام الجخ

لكن مع عوده البرادعى والاستقبال الكبير اللى شهده المطار والجروب الى كنت فيه بالاسم بس لحد مشوفت الحكايه بتكبر كل يوم

اتطوعت وبقيت من نشطاء الحمله 

مع الوقت اتعرفت على ناس من ابطالى بتوع 2005 وقعدو يحكولى عن ذكرياتهم

احترمتهم جدا .. 

افتكرت ذكريات كفايه دى دلوقت

وافتكرت ان دلوقت جت الفرصه انى ابقى من الناس اللى احترمتهم دول

انا ماليش اى طموح سياسى انا بس عايز بلد احسن اعيش فيها مواطن محترم،عشان كده انا بشارك فى كل حاجه دلوقت لكن لحد 2011 بس ..وهو تقريبا كله لحد 2011 بس 

فى دلوقت حاجه بتحصل ولازم كلنا نشارك 

بس يا ترى هل هنقدر نحقق كل الامال ولا هننهار زى كفايه 2005

ساعات بقول نقدر وساعات بشوف حالنا واقول لا.

انما يبقى السؤال؟؟؟ والف مليون احتمال!!!

تاكسي

اشتريت الكتاب ده من معرض الكتاب اللى بيتعمل عندنا فى اسكندريه

كان نازل ومعمول حواليه ضجه لانه واضح انه عمل اثاره لما نزل فى معرض الكتاب فى القاهره

الكتاب بسيط جدا 

الكاتب بيحكى فيه الحواديت اللى بيسمعها كل يوم من سواقين التاكسي

فى حاجات عجبتنى اوى اوى وفى حاجات متوقعتش تتنشر عن الحكومه

الكتاب بيوصف مجتمعنا عن طريق الحواديت اللى بيشوفها المؤلف كل يوم

ممكن نقول 9\10

مشربتش من نيلها؟؟؟

 

بلدنا آمانة فى إيدينا.. نعليها مادام عايشين

نعيش فيها سنين و سنين و إحنا مطمنين

 
ما شربتش من نيلها؟ طب جربت تغنيلها؟
جربت فى عز ما تحزن تمشى فى شوارعها و تشكيلها؟
ما مشيتش فى ضواحيها؟ طيب ما كبرتش فيها؟
ولا ليك صورة ع الرمل دامت ع الشط بمعانيها

 
دور جواك تلقاها هى الصحبة و هى الأهل
عشرة بلدى بتبقى نسيانها ع البال مش سهل
يمكن ناسى لإنك فيها
مش واحشاك و لا غيبت عليها
بس اللى مجرب و فارقها قال فى الدنيا ما فيش بعديها

إن غبت بحنلها و أنسى الدنيا و أجيلها
و إن جيت أنسى تفكرنا بمليون ذكرى القلب شايلها< غالية بلدنا علينا و ها تفضل فى عنينا
و مدام بنحب بلدنا تبقى ها تتغير بإيدنا

 
إحنا اللى نعليها بإيدينا نخليها
أجمل لينا و لولادنا مهما العمر يعدى عليها

بـــــــــــــــــحـــبك يــا بـــــــــــــلدى 

انا مصرى وابويا مصرى

مين بقى بيقول مصرى بفخر دلوقت ويرفع راسه لفوق!!!!!

اااااااااااااااااه يا بلدى