طب واحده واحده

وبلاش كل ده

ييجى مره واحده

لا اتجنن كده

منع عمرو اديب

ماشى..مش مشكله عديها

منع ابراهيم عيسى من برنامج بلدنا بالمصرى

على اون تى فى

ماشى مش مشكله عديها

منع علاء صادق اللى مالوش فى اى حاجه

كل ذنبه انه اتكلم عن وجوب الاعتذار على وزير الداخليه

(اللى انا شايف انه يجب محاكمته مش انه يعتذر ياخى تيت)

ده كان ماسك امن الدوله قبل ميبقى وزير

يعنى لو ملفه اتفتح بحق ربنا قدام محكمه زى محكمه العدل الدوليه هيتم محاكمته اكتر من مجرمى الحرب

بكره هنعرف المستخبى بعد بتاع 20 سنه كده

خلى اولاده يغرقو فى العار ساعتها

المهم نرجع لموضوعنا

طرد ابراهيم عيسى من الدستور

ايقاف علاء الاسوانى عن الكتابه

ونفس الشئ مع حمدى قنديل

لا ثوانى بقى

نقف شويه

انها حقا ازهى عصور الملوخيه

واضح ان راعى الديمقراطيه فى مصر خلاص مرارته اتفقعت، ونظامه مفاصله سابت.. والمركب بتغرق على رأى عمنا جلال عامر

اللى هيتمنع قريب برده

د-ايمن نور عمل مدونه

الظاهر بقى هو ده الشباك الوحيد لكل اللى عايز يتكلم دلوقت

والنهارده قريت تصريح ابراهيم عيسى ان سبب منعه هو مقالات د-ايمن نور

وبرده اعلانه قبل كده ان سبب خلافه مع رضا ادوارد هو مقال د-البرادعى

الخلاصه

النظام خلاص مفاصله سابت

وعوراته كترت اوى اوى لدرجه انه بقى زى العملاق اللى بينهار وعمال يطوح بايده ويلوش اى حد يقف فى وشه قبل السقوط

المركب بتغرق يا ريس

متحاولوش

قفلتو قنوات الحكمه والناس والرحمه

اهلا بيكو

طيرتو الدستور

اديتو تعليماتكو لكل اللى اتفضل عشان يكشو ويخافو

خلاص انسى

ساعه الصفر قربت

الشعب بكره يبقى جاهز

وهتاخدو شلوت ونشوفكو.... ولا اقولك

 بلاش نشوفكو احنا اساسا زهقنا من خلقكو

التدوين هو الحل

لحد مالشعب كله يفوق والتغيير قادم قادم

لسه فيكى خير يا بلدى

انا حكيت على الجولات دى كتير قبل كده مش عايز اصدعكو تانى

وكل الجولات اللى فاتت موجوده فى المدونه

كل مره زى اللى قبلها بس المره دى هضيف الجديد على طول

الجوله اول امبارح كانت فى بحرى

وهى منطقه الى حد ما فقيره ونسبه التعليم فيها اقل بالنسبه الى المناطق الاخرى فى اسكندريه

طبعا الاقبال كان ضعيف وده رجعنى تانى لنقطه ان الناس بتعانى بس برده بتخاف تشتكى وان الجهل هو عدونا الاول قبل الحزب الوطنى  والتزوير والفساد

الموقف اللى استوقفنى كثيرا (حلوه استوقفنى دى)

لما غلب حمارى مع الناس

وقفنا مشلولين وعاجزين عن الفهم وسط كل الناس الميته دى (على رأى الرائع احمد خالد توفيق) مئات بل والوف بل ملايين السيدات حباره--راجع مقال السيد حباره

نرجع تانى للموقف

وقفنا مشلولين فبصيت ع البحر لقيت واحد قاعد جنب ابوه واخته وامه وفاتح اللاب توب وبيكتب ومركز

قولت لحازم صاحبى وزميلى الانتيخ

يلا يا حازم الراجل ده شكله متعلم وهيتجاوب معانا

لسه بقوله السلام عليكم ممكن اعطل حضرتك خمس دقايق

 لقيته رد عليا وبجفاء شديد: لا امشى من هنا

انا استغربت جدا،هو برده بصلى وقالى هو انتو مش من الحزب الوطنى..قولتله لا واديته البيان قولتله بقى الحزب الوطنى هيلم توقيعات زى دى وكمان لابسلك تى شيرت البرادعي (ساحره ولا مش ساحره :D)

امه واخته بصولى وضحكو 

فقالى بحسبك من حمله جمال مبارك،سيبلى الورق وانا هقراه سيبتله اربع ورقات

ورحت اكلم شباب تانيين معديين بعد عشر دقايق لقيت حازم بيدينى اربع ورقات بيقولى خد الراجل وعيلته وقعوا

متتخيلوش كميه الفرح اللى حسيت بيها

وقولت رغم انى ساعات بقول الناس دي متستاهلش بس مواقف زى ديه بتدى الواحد دفعة للامام

لسه فيكى خير يا بلدى 

صور الجوله على الفيس بوك

كفايه ..2005 -2011

                                    الحركه المصريه من اجل التغيير (كفايه)

اشهر حركه احتجاجيه فى الخمس سنين اللى فاتو

وام كل الحركات اللى قامت بعدها

بدايه... انا للاسف مشتركتش فى اى فعاليه من فعاليات كفايه فى عزها 2004 و 2005

ايامها كنت صغير مبفهمش،وكمان كان عندى امتحانات الثانويه العامه والنت مكتش انتشر زى دلوقت

بس رغم كده كنت متابع اخبارها كويس

وفرحت جدا لما حسيت ان الناس عايزه تغير الوضع وابتدت تثور

وكنت ببص لكل اعضاء الحركه على انهم مناضلين نفسي اشوف حد فيهم عشان اسلم عليه

كان ايامها لسه برده الصحافه المستقله بادئه

واكتر صحيفه ارتبطت فى ذهنى بالفتره دى جريده الفجر

اخبار الحركه كانت ماليه الجرايد و الصور كانت تحرك المشاعر وانا لسه فاكر صور مظاهره ضريح سعد زغلول والشموع

المظاهره اللى حسيت انها ممكن تعمل ثوره 

بس للاسف انهارت الحركه واختفت بعدها

يمكن عشان عقدنا عليها الكثير من الامال واستنينا كالعاده حد يغيرلنا واحنا قاعدين فى البيت

المهم 

انا من كام شهر كنت عبيط

على رأى هشام الجخ

لكن مع عوده البرادعى والاستقبال الكبير اللى شهده المطار والجروب الى كنت فيه بالاسم بس لحد مشوفت الحكايه بتكبر كل يوم

اتطوعت وبقيت من نشطاء الحمله 

مع الوقت اتعرفت على ناس من ابطالى بتوع 2005 وقعدو يحكولى عن ذكرياتهم

احترمتهم جدا .. 

افتكرت ذكريات كفايه دى دلوقت

وافتكرت ان دلوقت جت الفرصه انى ابقى من الناس اللى احترمتهم دول

انا ماليش اى طموح سياسى انا بس عايز بلد احسن اعيش فيها مواطن محترم،عشان كده انا بشارك فى كل حاجه دلوقت لكن لحد 2011 بس ..وهو تقريبا كله لحد 2011 بس 

فى دلوقت حاجه بتحصل ولازم كلنا نشارك 

بس يا ترى هل هنقدر نحقق كل الامال ولا هننهار زى كفايه 2005

ساعات بقول نقدر وساعات بشوف حالنا واقول لا.

انما يبقى السؤال؟؟؟ والف مليون احتمال!!!

مسيره السيارات واعتداءات الامن

 
انا في المستشفي دلوقت امن الدوله ضربنا
 about 11 hours ago via mobile web

مؤمن مغمي عليه دلوقت و نائل ومحمود ممسوكين

about 11 hours ago via mobile web

 خدو 8 عربيات مننا
about 11 hours ago via mobile web

حد ينقل اللي بكتبه ده ع الفيس
about 11 hours ago via mobile web

سرقو المحافظ و الشنط اللي في العربيات
about 11 hours ago via mobile web

هنوجه المحضر ضد هشام الخطيب
about 11 hours ago via mobile web

انا واقف مع المهندس سيد بسيوني معانا من الاول
about 11 hours ago via mobile web

الاوضاع شبه مستقره الحمدلله
about 10 hours ago via mobile web

اخر اخبار اللي اتمسكوا انهم في الحضانه مع العربيات
about 10 hours ago via mobile web

اخر تويتايه قبل مالشحن يخلص الناس خرجت و 5 عربيات اتحجزت
about 10 hours ago via mobile web  

ده كان اللى كتبته على تويتر من مستشفى القوات المسلحه وانا فى عز المعمعه

فلاش باك للى حصل النهارده من الاول:

 كان المفروض النهارده نعمل جوله بالسيارات زى اللى اتعملت فى القاهره من كام يوم

الفكره دى كانت فى بالنا من فتره بس مكناش لسه اتقفنا عليها

المهم تم الاتفاق اننا نعملها الاتنين وهنبدء من عند كارفور الساعه5

لما روحت عند كارفور ملقيتش حد بس لاحظت ان فى كذا بوكس واقفين

 بصيت لقيت مدير امن اسكندريه ومعاه كام ظابط فى زى الشرطه

كلمت الناس وعرفت انهم واقفين عند الناحيه التانيه وواقفين بعيد عن بعض ومش مطلعين اعلام او بوسترات عشان منلفتش نظر الامن

كلمت نائل وركبت معاه واستنينا لما الناس اتلمت وطلعت المسيره

كنا مطلعين الاعلام والبوسترات من الشبابيك وواخدين شمال وبنكلم الناس اللى تعدى جنبنا

وقولنا خلاص بقى فلتنا من الامن 

اتحركنا لناحيه البحر عن طريق محرم بك لحد موصلنا لحد مبنى اداره الجامعه 

وخلال الطريق النجاح اللى عملناه هو اللى خلانا نكمل اكتر لاننا كنا المفروض نقف قبل البحر لكن قولنا نكمل

كنا بنوزع اعلام وبوسترات ونلاقى الناس بتتفاعل وتسالنا فيه ايه ونقولهم البرادعى يقولو يارب

وناس تسالنا هو مين اللى هيلعب النهارده :D 

واحنا طالعين ع الكورنيش عند مبنى اداره الجامعه جيه ظابط ومعاه اتنين عساكر وقطعو علينا الطريق بالونش
نزل الظابط وقال محدش يتحرك

خد الرخص ووقف يتكلم ويهزر مع الناس وهو اساسا كان الغرض انه يعطلنا لحد ماالأمن اللى زوغنا منه عند كارفور ييجى
ابتدى الظباط والمخبرين يوصلو وموتوسيكلات

وفى ناس بتقول ان مدير الامن جيه فى مبنى اداره الجامعه جنبنا

المهم اننا نزلنا من العربيات وقولنا هناخد الرخص دلوقت ونخلع
لكن لقينا الموضوع بيكبر ... بما انها كده كده باظت كله نزل بالاعلام والبوسترات وابتدينا نكلم الناس اللى ماشيين ع الكورنيش والناس تزمر وهى ماشيه ع الكورنيش  وناس خدت بوسترات ووقفت معانا

الظباط مرضوش يرجعو الرخص وابتدينا نهتف حريه حريه وبعد مكنا فى حالنا هما بغباءهم خلوها مظاهره
وابتدى امن اكتر يوصل ومعظمهم امن دوله وكميه كبيره جدا من المخبرين

فجأه لقينا ابراهيم بيتشد على جوه طلعنا كلنا نجرى وراه عشان لو لوحده هياخدوه لو كلنا معاه مش هيقدرو يعملو حاجه
ابتدت الاحتكاكات مع الامن هنا قامو عملو علينا كردون كنا حوالى عشره جوا والمخبرين حوالينا عمالين يزوقونا كل منحاول نخرج
والناس خارج من البلكونات والشبابيك تشوف فى ايه وايمان عماله تزعق فيهم متخافوش
 والمهندس سيد بسيونى قعد يتكلم مع الظباط عشان نخرج بعدين جاب هيثم يمكن يوصلو لحل

فى الشارع ده خدو الكاميرا من مؤمن
والكاميرا كان عليها كل حاجه لان مؤمن كان فى اول عربيه وبيصور المسيره من الاول

الظابط فتحلنا وقالنا بس تخرجو من الناحيه دى (عكس الطريق اللى كنا جايين منه)
قولنا لا مش هنمشي غير لما ناخد الرخص رجعنا تانى ع البحر لقينا الونش بيشيل عربيه هيثم
وكان فيها شنط ومحافظ ناس فجأه لقيت حد بيصوت وبصيت لقيت مؤمن مرمى على شنطه عربيه

روحت لقيته مش عارف يصلب طوله
حاولنا نشيله جسمه متخشب نيمناه ع الارض وواحد جاب ميه وحاولنا نفوقه مش عارفين

كمه كان فيه دم وبنطلونه مقطوع وسالت فى ايه؟؟ كذا واحد شاف الظابط هشام الخطيب(عقيد امن دوله) بنفسه وهو بيضربه فى وشه


شيلناه وقولنا نروح بيه المستشفى الظابط مكانش راضى
قولناله هنروح بيه يعنى هنروح بيه
اتصلت بالاسعاف عشان لو الظابط مرضاش يخلينا نوديه المستشفى نلحقه  وقبل مكلمهم لقيناه تاكسي وقف نقلته انا وجون وايمان وطلعنا على مستشفى القوات المسلحه

فى الطريق كان واعى وبيحرك ايديه بس مش قادر يفتح عينيه ولا يتكلم

انا وايمان ومؤمن كنا كلنا لابسين تى شيرتات البرادعى واحنا داخلين وكلهم بيبصولنا قلعت التى شيرت ودخلنا ع الطوارئ هناك الدكتور كشف عليه وقال هى حاجه نفسيه مش بدنيه كان مؤمن ساعتها بياخد نفس بسرعه رهيبه

اداله مهدئ وقال سيبوه شويه وهيبقى كويس
دخلت انا وايمان لقيناه فى وعيه والحمدلله هدى وبقى احسن بس مش بيفتح عينيه

قولنالهم فى الاستقبال ان واحد ضربه فى خناقه مش على اللى حصل

كلمنا الناس  وكذا واحد كلمونى من القاهره ومن طنطا ومن كل حته وانا اقولهم انشرو الخبر اهم حاجه وكلمت نبيل وقولتله يكلم الجرايد وكلمت نائل وعرفت ان هو ومحمود فى المرور واحتمال يروحو المديريه
وساعتها كتبت على تويتر وقلنا للناس تنشر ع النت اللى بيحصل

وصل ناصر ودخل يشوف التقرير الطبى عشان نعمل المحضر وسالت المهندس سيد بسيونى ع الناس اللى اتمسكت قالى ان الموضوع هيخلص فى المرور بتهمه الازعاج وتعطيل المرور و ملصقات

لكن هما هيخافو يكبر الموضوع ويدخلوه فى البرادعى والتغيير وكده الحمدلله اطمنت

صورت مؤمن الصورتين الموجودين واللى كل الناس شافتهم دول
وروحت مع اسماعيل رفعناهم ع النت و رجعت عند المستشفى تانى لقيت مؤمن الحمدلله ع الباب وقام وكويس الحمدلله

والحمدلله اتصلت ولقيت الناس كلها روحت بس ولاد التيت خدو خمس عربيات

الحمدلله ان محدش جراله حاجه وده نهايه فاصل جديد من الديمقراطيه اللى الحزب الواطى بيتفاخر بيها

الصور اللى صورتها النهارده اهيه والباقى ع الفيسبوك

ودول النهارده فى المسيره

الاخبار فى كذا موقع

الدستور .. مصراوى .. الشروق

وده بيان الحمله 

امواج التغيير ..الجوله التانيه

ياريت تقرو عن الجوله الاولى ،هتبقو فاهمين النظام اللى بنعمله

انا هتكلم بس عن بعض الاختلافات فى جوله النهارده

اولا المكان كان فى المنشيه وملحقناش نوصل لمحطه الرمل

النهارده كنا نازلين وهدفنا هو جمع التوقيعات وبرده الدعايه لاننا لابسين التى شيرتات

كنا حوالى 15 ناشط بس

اول منزلنا لقينا صحفى من المصرى اليوم والمصور كانو معانا لمده تلت ساعه بعدين مشوا واحنا كملنا

اتقسمنا لكذا مجموعه واحده تراقب الجو والباقى بيتفاعل مع الناس

بعض الملحوظات بقى:

نادر لما حد فوق التلاتين بيوقع ده اولا

 معظم الموقعين اعمارهم مابين ال18 وال30

اختيار الناس اللى هتكلمهم مهم ..انجح تفاعل بيبقى مع الشباب اللى ماشيين شله حوالى من 3-5 مع بعض

لان لو واحد اقتنع هيشجع الباقى

وبرده ساعات واحد بيحب يبين انه ايجابى اكتر من اصحابه وبرده يشجعهم

اه كل الناس بتبقى مقتنعه بفكره التغيير بس كتير بيخافو يوقعو

فمتزعلش لو محدش وقع المهم انهم معاك فى الفكره

الملحوظه التانيه الغريبه جدا

هى اننا لم نتعرض لاى مضايقات من الامن على الاطلاق

رغم اننا اول منزلنا شافنا عساكر الدوريه اللى بيبقو ماشيين ع البحر الساعه 8 ونص

توقعت ان فى خلال ربع ساعه هييجى ظباط زى المره اللى فاتت

لكن هو بس جيه ظابط واحد عمل كام اتصال وبعدين مشى من غير ميعمل حاجه كانه خد اوامر بعدم التعرض

خدنا راحتنا خالص فى الكلام مع الناس لحد الساعه 10

اكتر موقف ضحكنى لما واحد بعد موقع, صمم يتصور معايا 

 

 قابلت ناس من كل الانواع من اول اللى يقولك مين قال ان حسنى مبارك وحش؟!! ومين قال ان الانتخابات بتتزور؟!!!

لحد اللى اول مشافنى قال هات امضى وقال فيها ايه لما ياخدونى فى امن الدوله !!

كان يوم حلو

بس ان شاء الله المره الجايه يبقى المكان افضل لان المنشيه مش مكان حلو تقابل فيه الاغلبيه اللى بتوقع السابق ذكرها

ده الخبر فى المصرى اليوم

 وده فى اليوم السابع

ونراكم فى العمليات القادمه

جوله على الكورنيش

خبر عاجل :جوله ع الكورنيش فى اول ظهور علنى

اعزائى المشاهدين
اليكم التفاصيل

اتفقنا على اننا نعمل جوله دعائيه لابسين فيها تى شيرتات حمله دعم البرادعى
الجولات اللى قبل كده تمت واحده فى سان استيفانو والتنيه فى كارفور

كان الامن بيبقى قليل والابواب مغلقه مفيش خطر

المره دى قررنا اننا ننزل علنى جدا على الكورنيش فى سيدى بشر
وبدون اى خوف

الجوله كانت خاطفه لمده ساعه واحده

الهدف الاساسى كان اننا نتمشي ع البحر بالتى شيرتات من سيدى بشر لحد المندره

كنا 19 ناشط بس ويدوب لبسنا التى شيرتات

لقينا ناس كتير بتتجاوب معانا وبتسال ايه ده ولابسين كده ليه
طلعنا التوقيعات وبدءنا نكلمهم ع المطالب السبعه

رغم انى ليا اعتراض ع النقطه دى
المفروض اننا لما ننزل نكون محددين هدفنا

احنا عايزينها تبقى جوله بالتى شيرتات لمسافه كبيره ويشوفنا ناس كتيره كدعايه للبرادعى
ولا جوله للم التوقيعات

ناس كتير كانت ولا سمعت عن الموضوع ده قبل كده ولا سمعت عن الحمله ولا اى حاجه
بس احلى حاجه ان الناس اول متسمع توافق ولمينا توقيعات كتير

عظمه الموضوع انك تخلى واحد عمره مشافك قبل كده وميعرفكش عشان يصدقك انه يمضيلك على بيان ضد الحكومه وبرقم البطاقه كمان
انا فى ناس اصحابى اعرفهم من سنين وخافو يوقعو وتلاقى التجاوب ده من واحد ميعرفكش ولا يثق فيك

طبعا ربع ساعه ولقينا مخبرين...نص ساعه بقى بوكس وظابط ع الناحيه التنيه من الكورنيش
وهكذا اول مكترو اللى كان لابس تى شيرت تحت بتاع الحمله قلع

ولمينا التوقيعات المليانه واديناها لواحد وخلع عشان لو حصل حاجه
وقى دقائق معدوده كنا اختفينا

كده اشطه ،وانا بقولهم من دلوقت استعدو لحملات الكر والفر

وده لينك الخبر فى اليوم السابع

رغم انى ليا تحفظ على الخبر فى كلمه تغزو

هى لغويا مش صحيحه

لان الغزو هو انك تهجم على خصمك فى ارضه والكورنيش ده ارضنا مش ارضهم بس مش مشكله

وفعلا الوضع دلوقت احنا بنغزو عشان نسترجع حقنا
وهما بيدافعو عن اللى نهبوه مننا

ولينك الخبر على موقع الحمله