مين طفى النور

هل ممكن يكون فى شعب كامل مبيفكرش؟؟؟

لما بتمشى فى الشارع او لما بتراقب تصرفاتنا اليوميه بتحس ان الناس وقفت دماغها ومبتفكرش
وبرده فى امور ومواضيع كتير الناس خلاص بطلت تشغل دماغها

فى ايه يا جدعان؟!!
هو كلكو اتسطلتو ولا ايه،هما بيحطولنا الحشيش فى الميه!!

امال فين بقى المصرى اللى بيهد الجبال ،المارد الجبار
والطفل المصرى اذكى طفل فى العالم بس هو ظروفه معصلجه شويه والكلام ده

لو بصيت ع العالم ولنأخد المانيا على سبيل المثال
هل الشعب بتاعهم عباقره مثلا ..لا طبعا مهم ناس زينا زيهم

اساسا فى اى دوله فى العالم فى حوالى 5% من السكان هما اللى بيقودو الدوله زى متقول هما عقل الماكينه والباقى التروس
بس لما الخير بيعم بيعم على كله ولو الماكينه وقفت الخساره على كله

نرجع تانى لموضوع الشعب يعنى هما مطلعوش عباقره ولا الهه هما شعب زينا وبياكلو وينامو ويتكاثرو برده

طب ليه هما قدام واحنا ورا؟؟؟

فى رايى فى اسباب متعدده فى مجتمعنا هما اللى جابونا ورا
بس اكبرهم:

الاول هو البعد عن السياسه ومفكرين ان السياسه ملهاش علاقه بعيشيتنا
والتانى هو التدين الظاهرى
والتالت والاكبر هو الفهلوه

اعتقادنا ان السياسه ملهاش دخل بحياتنا العاديه ده اكبر غباء
وده اللى بنحاول نوصله للناس دلوقت
لازم تعرف ان رغيف العيش مرتبط بالدستور وتغييره، بالديمقراطيه وتحقيقها

المواطن اللى نايم على ودانه نفسي اساله سؤال ايه اللى يخلى مبارك يعمل حاجه لمصلحتك او يفكر فيك
طول مهو عارف ان صوتك محشور جوا بق امك وان انت مش هتفرق معاه ببصله ليه يدورلك على مصلحتك

الحاجه التانيه هى التدين الظاهرى
تبص على شيوخ زى بتوع الحكمه والناس
وتلاقيهم مواضيعهم هيا هيا مش عارف بيخلو الناس تفيص وترضى بالوساخه اللى عايشين فيها

وشيوخ الحيض والنفاس
اللى مبيتكلموش غير على النقاب وجسم المرأه وعمل المرأه وتفاهات زى تخش الحمام برجلك اليمين ولا الشمال
وطول اليوم فتاوى ياخى تييييييييييييت
لا والمصيبه الكبرى لما واحد كفر البرادعى ولما حمار تانى قالك المظاهرات حرام ايام اضراب 6 ابريل
يعنى بلدك تتسرق وتاخد على قفاك وحرام تقول اى
ومفيش واحد فيهم قال حرام على الحاكم الللى باع البلد وحط التمن فى جيبه

ايه الهبل ده
ايه اللى وصلناله ده

ده ميمنعش ان فى شيوخ كويسين حاولو يتصدو للى بيحصل بس ولا حول ولاقوه الا بالله اترمو فى السجون
ومنهم مشاهير زى عائض القرنى اللى اتمنع من السفر برا السعوديه عشر سنين واعتقل سنه عشان حاول يتكلم فى سياسه السعوديه
واتقالو خد تعالى هنا من قفا امك

وفقهاء السلطان شيوخ التكفير دول نسو حاجات فى الاسلام
زى اتقان العمل والاحساس بالجمال ودى الحاجات اللى بيتكلم عليها الناس المجددين زى عمرو خالد هى دى الناس اللى بتفهم

ودى الحاجات اللى احنا محتاجينها دلوقت
لان مجتمعاتنا منهاره ومتخلفه عن ركب الحضاره بمئات السنين

وعشان كده عمرو خالد اتحارب واتطرد برا مصر
لانه حاول يصلح الناس ويخليهم يرتقو ويبقو احسن

وده بيثبت ان المقوله اللى بتقولك الاصلاح من تحت مش من فوق خاطئه ،لان لو اللى فوق مش عايز اصلاح هيوقفه (وهما مش عايزين)
وده اللى حصل مع عمرو خالد اللى كان هيعمل جيل من الشباب قادر على رفع وعى الامه والتقدم بيها

الحكومه سايبه السلفيين و الوهابيين يهيصو براحتهم
طول ماهم مخدرين الشعب لكن لو اتكلمت على اى حد من الاسلام المعتدل او الاسلام السياسى

نيجى بقى للطامه الكبرى(الخازوق الكبير يعنى)
اللى هى الفهلوه
ودى بقى داء المجتمع المصرى تلاقى الناس تحاول تتحايل على اي حاجه بالفهلوه

والفهلوه دى فتحت كتير من السكك المخربه:

قضت على ماتبقى من اتقان العمل
هخلصلك اى حاجه يا بيه فى خمس دقايق انا واد مخلص

قضت على الشرف بالواسطه والمحسوبيه
الواد الفهلوى جاب واسطه خليته يتعين معرفش فين
وده ضيع الكفاءات من البلد واكبر اسباب الانهيار دلوقت

قضت على الجمل بالقبح
للى بيرمى الزباله من البلكونه او من العربيه فى الشارع
اللى بيعمل اعلان يكتب ع الحيطه
مهو الواد فهلوى بقى

تلاقى واحد بيعمل كل حاجه غلط والناس متبصلوش على انه بيعمل غلط
يقولك لا ده واد صايع و مفتح بيعرف يسلك اموره

الثقافه بت الكلب الخاطئه دى جابتنا ورا

فى الاخر اقدر اقول ان الحكومه وقفت مخ الشعب والشعب ارتضى انه يبقى حمار
لكن الحمدلله لسه فى امل
لسه فى ناس بتنتفض وبتطالب بحقوقها،وماضاع حق ورائه مطالب
فى حوالى 250 الف واحد مضو بيان التغيير لحد وقت كتابه التدوينه دى
دول لسه عندهم امل فى بكره

لكل اللى يقرى ديه شغل مخك ومتوقفهوش وقول لاهلك وصحابك النهضه هتحصل والماكينه هتشتغل بينا كلنا

اوعى تبص على اللى حواليك وتقول ان ليه اتعب عشان الهمج دول
النهضه مش هتحصل غير بينا كلنا مش انت بس اللى هتعملها

واجهو الثقافات الخاطئه بالوعى ، واجهو الناس المسطوله وفوقوهم
واجهو الفهلاويه وعلموهم ،واجهو فقهاء السلطان ووقفوهم

وبكره اكيد هيبقى احلى