متنفعيش

نور حياتنا بيضيع و مينفعش من غيره نعيش
و ياريت معانا الضلمة حتى دى متلقيش
مش طايلين فوق ولا تحت
بقينا تماثيل من غير نحت
تماثيل حجارة فى بلدنا مانسويش

لو لقينا حد بيضحك نتعجب
و يمكن نحسدوه وناكل فى نفسنا و نتعذب
مهو السعادة بقت حاجة جديدة
رصيدنا فيها على الحديدة
|و كل حاجة حلوة بتتكذب
يا بلد بقيتى مبتحسيش

الناس بتكره بعض يمين و شمال
و الحب الاعظم حب المال
مفيش فرحة فيكى دامت
و كل شوية نقول هانت
و الحمل بقى فوق الاحتمال
و الحل بقى نطفش و منجيش
من الاخر يا بلد متنفعيش


طائر السلعوة

عار عليكو دم مينا

العار

العار ان مواطن يطلع ميتين امه
عشان يكسب قوت يومه اللى بيدفع منه ضرايب للدولة

بفلوسه دي بقى بيعملو مدرعات للجيش و بيشترو بيها بنزين
وبيدربو بيها ظابط على الحرب
وبيدو مرتبات للجيش

بفلوسه برضو بيفتحو مبنى التلفزيون
وبيدو مرتبات للعاملين فيه

من فلوسه برضه بيشترو سلاح للجيش والشرطة
وبيشترو ذخيرة للجيش والشرطة تتحط في السلاح ده

العار ان
الظابط اللى متعلم بفلوسه وبيقبض كل شهر مرتبه من فلوسه
يشيل السلاح اللى بفلوسه ويعمره بذخيره من فلوسه
ويركب مدرعة من فلوسه ويدوس بنزين من فلوسه

فالمدرعة تدوس عليه
او يضربه بالنار


العار ان
التلفزيون اللى مفتوح بفلوسه
يطلع فيه مذيع مرتبه من فلوسه

يقول قتلنا عميل وخاين للوطن

العار
 على كل كلب
ظلم او قتل او اهان مصري

العار
على كل كلب
صدق او نشر
خبر يظلم واحد مصري

ده اى مواطن مصري عادي


لكن انا مش بتكلم عن مواطن عادي
انا بتكلم عن واحد فوق العادي
واحد حب بلده اوي

شارك عشانها في الثورة من أول يوم
خاطر بحياته في كل يوم

واحد ضحى بكل حاجه زياده عن المواطن العادي

مينا كان أمل مصر
مينا كان شباب مصر
مينا دمه لما سال خسرنا جزء من مصر

الحلزونه

الحلزونه ياما الحلزونه
غطيني ياما يا حلزونه

نرجع لورا شويه وبالتحديد يوم 27-9
الفريق سامي عنان داخل على المشير طنطاوي مكتبه
وبيقوله تمام يا كبير
عملنالهم قانون الإنتخابات وهننزله

فرد المشير زي عادل إمام في الفيلم
الحلزونه موجوده؟

عنان:إيه الحلزونه دي؟؟

المشير قاله يعني المادة رقم 5

عشان لما يبمبكو نجيبهم نشربهم الشاي بالياسمين بتاعنا ونشيلهم الحلزونه

وقد كان

نزل كانون الإنتخابات بالصلاة ع النبي
ونزل وراه الناس ع التحرير

في جمعة إسترداد الثورة بعد متيقنو ان كل يوم للمجلس العسكري في الحكم هو انتكاسة للثورة
وإن الثورة المصرية في أيد الثورة المضادة

مهد لنزول الناس بيان من كتلة الاحزاب المصرية انهم هيقاطعو الانتخابات في ظل وجود الحلزونة
و بيان مشترك من مرشحي الرئاسة ان المجلس لازم يمشي وان الطوارئ انتهت

طبعا المشير خطته مشيت وجاب الاحزاب في اليوم اللى بعد المليونية وقالهم هشيلكو الحلزونه
زقططو يا ولاد
بس تمضو على ده

قالوله ايه ده
قالهم :بيان ابوس القدم وابدي الندم
واؤيد وابايع وابوس المجلس من بوقه
عشان هو حامي حمى الثورة

وعشان مضربتوناش بالنار رغم ان كان مفيش اوامر بضرب النار

وطبعا بعض الاحزاب موقعتش في الخيه والحمدلله

المهم بقى ان الراجل المحترم اللى كنت ضده بس طلع اكتر واحد عايز الثورة تستمر وعارف الخطر الحقيقي عليها
الراجل الطيب ده اللى اسمه حازم

نزل التحرير يا ولاد يوم الجمعة وهيبوس على رجل كل القوى الثورية عشان تتحد ضد المجلس
وقالهم متنتظروش من المجلس حاجه
ده هو الثورة المضادة
لكن هما مسمعوش الكلام وعملو زي اللى راحت تاخد بتار ابوها .. رجعت حامل


وسبحان الله بقى يا ناس
ان الراجل الطيب ده رغم انه محسوب على تيار معين وهو التيار الديني

إلا ان اول ناس باعته هما الاخوان والسلفيين
وده التشبيه العبقري اللى قاله شاب الخازوق خرج من دماغه زينا
اللى عمله الاخوان والسلفين بتوقيعهم على البيان كأنهم قالو لحازم ابو اسماعيل إذهب انت وربك فقاتلا إنا هاهنا قاعدون

المهم خلاصة القول
ان احنا كنا بنسب للمجلس لما نزل بيان قال لا صحة لا تأجيل انتخابات الرئاسة لعام 2012

دلوقت المجلس قاعد بشرعية كوكا زيرو لحد 2013

وكوكا زيرو هنا معناها ان المجلس مش راضي رئيس يحكم لحد بعد وضع والموافقة على دستور جديد عشان نعرف لو برلمانية يبقى مالوش سلطات ولو رئاسية يبقى له

رغم ان في الحالتين المفروض المجلس مالوش سلطات

وده كان خازوق 52
ودقني اهي لو المجلس ساب السلطة

ولو احنا اتوجعنا من خازوق قعدة عنان مع الاحزاب الكارتونية امبارح
فأنا ببشركو بالخازوق الجامد اوي الجاي
لما المجلس ينزلنا مواد فوق دستورية يكون فيها بيتحكم في الحياة السياسية

وصقفه كبيره اوي بقى للمشير وسمعني اغنية الحلزونه

كلامى

كلامى

يمكن كلام عادى
بس عشانه احارب و اعادى
اخش عشانه فى اى سد
و مخافش من اى حد
انا مش بهزر ده كلام بجد
حلمى ميكنش لكلامى حد

مش لازم يكون كلام مألوف
مش مهم يفهمه ملايين او ألوف
او مثلا يخلى الاعمى يشوف
كلامى مفهوش منع لاى حروف
كلامى فيه تفكير مفهوش خوف

حقول كلامى فى اى مكان
مش حسكت تانى زى زمان
مش حتكسف من اى حد مهما كان
حتى لو كان اسرئيل الكيان
و اللى بقوله ده ميزعلش انسان

حتكلم فى اى حاجة موجودة
سياسة،فن أو حتى مشاعر مكبوتة
مش حرجع زى زمان افكارى محدودة
حسيب الكلام يطلع لوحده من لسانى
حتكلم عالغلط اللى شايفه من مكانى
و عن اى حد ممكن يكون خلانى
اتغير لحاجة احسن و اكون انسان تانى

المهم انى اقول اللى جوايا
كلام موزون او اى حكاية
ده كلامى صاحبى و دايما معايا
حتكلم و حقوله احد النهاية

الأغنية الرائعة دي من تأليف واحد صاحبي
طلب إنها تنزل في المدونة بإسم 

طائر السلعوة


وفي أغنية تانيه هنزلها بكره

اختيار البيادة

بسم الله الرحمن الرحيم



نظراً لتتابع وتصاعد الاحداث في الفترة الاخيره
انا هكتب بسرعة عن اهم الملامح

انا كنت من المدافعين بشدة عن المجلس العسكري
وده كان موقف ناس كتير محترمة زي بلال فضل ونوارة نجم
(يا راجل دا انا كنت حاطط صورة طنطاوي بروفايل بيك ع الفيس بوك)
وده في فترة كان الكل بيشتم الناشطين اللي مع الجيش
وبيحذرونا من المجلس
وطلع معاهم حق

الوضع دلوقت يمكن تلخيصه في اننا شباب نيته حسنه
قام بثورة بس مالناش في لعبة السياسة

وده اللى خلاهم يلعبو بينا كويس ويحطو الثورة تحت السيطرة
ويكسبو رجل الشارع ويفتتونا فصيل فصيل
وخلو اكبر مشاغلنا هو الخناق مع بعضينا

كنا الاول لما المجلس بيعمل حاجه غلط بنحاول نبررها بأي شكل
بس منقولش انه ضدنا..ودايماً بنجيب الغلط علينا

وانا كنت حمار لما مصدقتش ظباط 8 ابريل الشجعان
وكنت حمار اكتر لما فكرت ان ممكن 25 واحد ينزلو يضحو بحياتهم عشان يعملو وقيعة

 دلوقت بقى في حاجات حصلت مبقاش فيها مساحة للتأويل
المجلس بمنتهى الوضوح بيطلعلنا صباعه (الفنجري)

لو قولنا في المسيرات والمظاهرات الشباب كانو هما الغلطانين
فلنفرض كده
رغم انه بالدليل محصلش
واتمنى اى حد بيقول الغلط ع المتظاهرين يفسر الصوره دي

لكن حركة حازم عبد العظيم مثلاً
او تخوين 6 ابريل
كلام الرويني عن حركة كفاية وانها غير مصرية
او اللى حصل مع دينا عبد الرحمن واتهام نجلاء بدير انها مخربة
ده غير بقى اللى اتعودنا عليه من استهبال ومدارية على مبارك والخ الخ
المجلس خلاص بقى بيلعب ع المكشوف



نفس تصورات النظام السابق انتو خونه وعملا واجندات

انا بقى انقلابي ع المجلس التام تم ببيان ان 6 ابريل خونه
ده خلاني اتخلى عن اعتقادي انهم شهرين ويعدو
ونستحمل المجلس حتى لو فاسد عشان هو صمام الامان
لحد متيجي الانتخابات ونختار اللى عايزينه وهو ييجي يشيل الفساد

لأني تأكدت ان المجلس مدام بدء التخوين يبقى هيطير اى حد كويس
وهو اللى هيختار لينا الرئيس القادم بمزاجه

وده فعلاً الى حصل النهاردة بتصريحات اللواء كاطو في الشروق
ان اتنين من مرشحي الرئاسة عملاء لامريكا


ابتدينا العمالة..والسيناريو واضح
المجلس ليه مرشح لرئاسة الجمهورية وهيخليه يكسب
المجلس مش هيخلى حد من برا يمسك ويكشف الفساد
هما عايزين واحد منهم يداري عليهم

والشخص ده اعتقد هيكون الفريق احمد شفيق
نظراً لأن المجلس عارف ان عمر سليمان كارت مبارك حرقه قبل ميمشي ومبقالوش قبول في الشارع

وان ناس كتير متعاطفه مع شفيق وشايفاه مخدش فرصته
وده اختيار البيادة

مستر شفيق مرشح المجلس العسكري لرئاسة الجمهورية
الوطني اللى مش عميل زي البرادعي وايمن نور و6 ابريل وكفاية وظباط 8 ابريل وحازم عبد العظيم
برعاية اليوم السابع
مرحب بحكم البيادة

نرجع تاني بقى للحل ايه للخروج من هذا الفخ

اول حاجة لازم نبقى متأكدين كويس من ان اغلب الشارع اللى كان معانا ايام مبارك هو مع الجيش دلوقت ضدنا
فلازم نرجع للى قولنا عليه اننا نبتدي نلعب سياسة

لازم نعرف ان المعادله ليها 3 اطراف دلوقت
ثوار وشعب وجيش
اللى هيكسب هو اللى هياخد الشعب في صفه

الناس لو هتنزل معانا تاني محتاجين حاجتين
اول حاجة: ان حد يقطعلها الشك باليقين ان المجلس ضد الثورة

وده يكون باستقالة عصام شرف
اعتقد ده الحل الوحيد اللى ممكن يقنع رجل الشارع ان المجلس فعلا مش مع الثورة

(حته على جنب:عصام شرف راجل كويس جدا
اللى مخليه يكمل وسط القرف ده هو معرفته انه لو مشى مش هيفيد فهو بيحارب على قد ميقدر
لكن لو عرف ان رحيله هيفيد فده هيخليه يستقيل
وده اللى أكده كل اللى قابلة او اللى قعد معاه او حتى حازم عبد العظيم نفسه اللى اتقلش من الوزارة)

تاني حاجة:انهم يبقو نازلين وهما عارفين ايه البديل للمجلس العسكري لو نزلنا ضده
وحتة البديل للمجلس دي شئ صعب جدا جدا
دي معضلة الثورة

مجلس رئاسي مدني مش هينفع وانا شرحت ليه في البوست اللى فات

الحل الاخير بالنسبة لي تكون حكومة انقاذ وطني

والحكومة دي انسب واحد في تصوري يشكلها هو عصام شرف
لأنه الوجه المقبول لدى الشارع
وبيطمن الناس بحيث ميحسوش ان في حد هيقفز ع السلطة
لأنه اصلاً المفروض ان في ايده السلطة

وعشان كده فانا بقول لكل الناس اللى تسمعني متشوهوش عصام شرف عشان قد يكون املنا الاخير

والحاجتين اللى قولت عليهم دول محتاجين مناورة سياسية
ولازم نتعلم سياسة بقى عشان نعرف ننجح الثورة

لأن لو فضلنا كده يبقى زي اللى بيلف حوالين نفسه وفي الاخر هيتعب ويقع

وفي الأخر هقول حاجة أهم حاجة قبل اي خطوة جايه نعملها
اننا نسترجع الرأي الشعبي في صفنا

وان اى موقف نلاقي ان رد فعل الشارع عليه مش هيبقى في صفنا
يبقى مناخدوش والا هنندم كتير

وربنا يحميكي يا مصر ويحمي ولادك اللي بيحبوكي

تحديث
مقال جمال فهمي في التحرير النهارده وكأنه بيتكلم عني

نقطة نظام

كلمتين في السريع كده بس مهمين

اللي شوفناه على مدى امبارح والنهارده بيؤكد حاجتين

اولاً ان نزولنا يوم الجمعة كان دافع لعصام شرف
خلاه ياخد قرارات ولأول مره (ثورية)
يعني استمدت شرعيتها من الثوره وليست قانونية
وده شيئ كويس
 

شئ كويس ليه؟؟

لانه كشف واحد زي العيسوي وحضرات الساده الظباط
اللى اعلنو رفضهم لتصريحات عصام شرف

وتمسكهم بزمايلهم المتهمين بقتل المتظاهرين

ثانياً لانه حمل رسالة اعتقد قصدها المجلس
بحضور سيادة الشفيق حفل تخريج دفعة جديدة من القوات الجوية

وهي ان لو مش عاجبكو شرف فاحنا هنرجعلكو شفيق

تعالو نراجع اسوء الاحتمالات اللى ممكن نتخيلها
ان عسام شرف يقدم استقالته والمجلس يجيب حد من الفلول

اقولكو هنفرض ان المجلس طلع بيان صريح كده
احنا ضحكنا عليكو ولبسناكو واحنا مبارك رقم 2

تفتكرو هنعمل ايه!!!؟

هننزل ملايين بالشوارع ونصطدم بالجيش
طب نجحنا وشيلنا المجلس
حلو

هنجيب مين بقى يحكم؟؟؟

هننقي مجلس رئاسي مدني
طب مين هيختاره ومين هيعترض

كان في رأي امبارح فعلا قال من غير المجلس هيبقى فيه فوضى مطلقه
وللأسف الكلام ده صحيح

انا اقتنعت بالرأي ده فعلاً
الحل الوحيد دلوقت لمصلحة الوطن
هو ان المجلس يستمر
لحد منقضى عليه بالانتخابات
والحل الافضل للثوره ان شرف يستمر

بس عشان شرف يبقى فعال لينا
|لازم نكون دفعة فى ضهره ونقول ده بعلو صوتنا
مش نطالب باقالته

ده رأيي .. وده اللى شايف فيه مصلحة البلد دلوقت

انا هستمر فى المظاهرات والاعتصام لكن بعمل ده تأييداً لشرف وليس مطالباً بإسقاطه

كفايه يا ولاد الكنبة

لما حسني مبارك أعلن اقالة الحكومة يوم 28 يناير
وانا مروح من المديرية يوم 29 بعد مكنت محبوس 3 ايام

قابلت ناس قعدو يقولولى كفاية بقى
وقرايبي كلموني وناس زمايلي في الكلية عشان يتطمنو عليا وبرضه نفس الاسطوانة

عايزين ايه اكتر من كده
اهو التغيير حصل اهو
وهنجيب حكومة جديد
كفايه بقى عاجبكو حال البلد!؟

يوم 1 فبراير وبعد مليونية التلات وخطاب مبارك

ناس كتير برضه

عايزين ايه اكتر من كده
اهو التغيير حصل اهو
والراجل قال مش هيرشح نفسه تاني
وسيبوه يموت في بلده
كفايه بقى عاجبكو حال البلد!؟

بعد خلع مبارك في 11 فبراير وفى جمعة سيادة الشفيق

عايزين ايه اكتر من كده
اهو التغيير حصل اهو
مبارك اتنحى وسيبو شفيق يعدي الفترة الانتقالية دي
كفايه بقى عاجبكو حال البلد!؟

المشكلة ان في كل مره لما بيتحقق هدفنا بتلاقي ولاد الكنبة اول ناس بيحتفلو
وكأنهم حققو الإنجاز
وبيفكروني بكلام محامي الشيطان(محامي المخلوع)
لما قال الرئيس مبارك أول من أيد ثورة يناير

بقول الكلام ده بعد مشوفت ردود الفعل لحزب الكنبة على أحداث التحرير
والجملة بت الكلب اللى فقعتني زي مفقعت بلال فضل وخلته يكتب كنت بلطجياً
لما خرج حزب الكنبة يقول دول بلطجية مش دي أشكال شباب 25 يناير

وانت كنت فين في 25 يناير يا كنبة عشان تقول مش هما دول

وتعليقاتهم برضه على مليونية امبارح
الثورة أولاً


أكيد كل واحد عنده من النوعية دي في قرايبة وصحابه
بس عايزكو بقى متخافوش على زعلهم لو اتكلمو قدامكو

لأنهم دايماً بيتكلمو ودايماً عاملين نفسهم فاهمين

لأن اللى شاف كل اللى حصل ده ومتغيرش يبقى انسى انه يتغير

واحد مات قدامه الف شهيد

وبقاله 6 شهور ولسه زي مهو
خلاص انا فقدت الأمل فيه

"بس خدو بالكو في فرق بين كنبة وكنبة
في واحد قاعد ع الكنبة بس قلبه معانا فى التحرير
ده اللى بيدينا القوه وده منقدرش نكمل من غيره
وفي قاعد ع الكنبة وعشان عاجز،جبان مش قادر ينزل التحرير بقى بيرمي الغلط على اللى فى التحرير
دول اللى بتكلم عليهم"

ولما اشوف واحد من حزب الكنبة دول بيهاجم الثورة او التحرير

هقوله فى وشه يا كنبة يا ابن الكنبة


والله ولي التوفيق

لماذا نقول (لا) للدستور أولاً

كثر الحديث و كثرت الدعوات عن وضع الدستور أولاً
وطالب رموز كبرى لها كافة الإحترم مثل البرادعي وابراهيم عيسى  بدستور أولاً
بل وصلت المبالغة لحد الدعوة لمقاطعة النتخابات اذا لم يتحقق هذا
زى مأعلن أسامة الغزالى حرب

وفى نفس الوقت اعترض الاخوان على هذا المطلب واتهمو من يقولة بالانقلاب على الديمقراطية
وصراحة مش الاخوان بس ، ده شخصية ليبرالية ليها وزنها زي د-عمرو حمزاوي
آله الليبرالية كما يدعوه بعض السلفيين
قال انه ضد الدستور أولاً ولن ننقلب على أول تجربة ديمقراطية لنا

 انا سمعت رأي الاستاذ ابراهيم عيسى اللى وضح ان المجلس هو اول من انقلب على الديمقراطية
وان الاعلان الدستوري فيه حاجات مختلفه عن اللى الناس صوتت عليها بنعم

بس هنخرج من خلاف انقلاب على الديمقراطية ولا لا، ونسيبه شويه..ونشوف الموضوع من زاوية تانيه
هي الأهم بالنسبة لي

لماذا ارغب في ان يقوم مجلس الشعب القادم باختيار لجنة تقوم بوضع الدستور
رغم انى من المصوتين بلا في استفتاء 19 مارس؟؟

أولاً:لأن دي أسرع وسيلة للخلاص من سيطرة المجلس الأعلى وانفراده بإتخاذ القرارات

"أو انا موافق اننا نأجل انتخابات مجلس الشعب بس على شرط كل تجاوز الجيش يعمله هنروح نضرب واحد من رؤساء الاحزاب دول قفا"

ثانياً:لأن دي أضمن وسيلة نضمن بيها ان الجيش مش هيقوم بوضع مواد تضمن ليه التدخل فى الحياة السياسية بعد كده
وده اللى لمح بيه ممدوح شاهين

"أو انا موافق اننا نحط دستور اولاً بس على شرط .. لو الجيش لبسنا دستور فيه مواد تخليه يتدخل فى الحياة السياسيه هنفشخ اللى طالب بكده"

سألت سؤال على تويتر
 ايه اضمنلنا ان الدستور المجلس ميلعبش فيه؟؟.. لجنة منتخبة من مجلس الشعب ولا لجنة عاملها الجيش؟؟؟

جتني اجابات حلوه
أهمهم إجابة بتفتح طرح للنقاش هي

لجنة منتخبة من الشعب مباشرة
 تقريباً دي الإجابة اللى بيقولها كل اللى عايزين الدستور أولاً وخايفين من تدخل المجلس في تعيين لجنة

حلو.. بس ده تعريف مجلس الشعب على فكرة

واذا كان خوفك ان الشعب ينتخب مجلس يسيطر عليه اغلبية مكونة من الاخوان والفلول
طب ماللى هيختار اللجنة هو الشعب برضه!!

كان في رد تاني بيقول
"لأ. انت عارف إن فيه ناس في مصر حتنخب عضو مجلس الشعب بناء علي خدماته ووعوده. وممكن تختار بمنطق تاني لما يكون مهمته وضع الدستور بس"

حلو بس ده معناه نسبة اكبر لنجاح الإسلاميين من مجلس شعب عادي
لان هيحصل نفس اسلوب الماده 2 ولازم ننقذ الدستور
وانتخب المسلم لحسن العلمانيين هيعملولك دستور بكيني
بالعكس ده فرصتنا فى مجلس شعب عادي أحسن

وللأسباب دي انا بفضل الحل الأمن وهو وضع دستور عن طريق لجنة يختارها مجلس شعب منتخب
ده أضمن طريق للحرية
.........................................
تحديث

سألني صديق سؤال لولبي
قالي الكلام ده حلو بس انت ليه فى الاستفتاء صوت بلا؟؟

دي إجابتي
عشان كنت عايز دستور جديد يا معلم..بس بعد مخسرنا الغزوه
امتثلت لرأي الاغلبية
فضلت كده لحد مشوفت فيديو ابراهيم عيسى وقولت المجلس هو اللى انقلب ع الديمقراطيه
وميلت لرأي دستور جديد وكده مش هيبقى انقلبنا ع الديمقراطية
بعدين لما سمعت كلام شاهين وعرفت ان المجلس هيلبسنا دستور والجيش ممكن يتدخل فى الحياه السياسيه
قولت لا يبقى مجلس الشعب الجاى يحطه اضمن

والله الموفق

حـسـام حـسـن

الخطر الأكبر

وقد خلق هذا الفراغ والتردد فى اتخاذ القرار خطراً ثانياً تمثل فى رغبة بعض المواطنين فى عودة أى سلطة حتى لو كانت غير ديمقراطية تواجه الفراغ الحالى والفلتان الأمنى والفوضى

من مقال د-عمرو الشوبكي في معرض حديثه عن الفراغ السياسي الحالى
وتردد كل المسؤولين والوزراء في اتخاذ القرارات
....................................

جالوب : 10 % من المصريين لا زالوا يدعمون الحزب الوطني بعد الثورة

من تقرير منظمة جالوب لإستطلاعات الرأي

الخطر الأكبر الذي يتهددنا حالياً هو فقدان الشعب إيمانه بالثورة يوم بعد يوم

وقبل منبدء نشتم ونقول دول ولاد كلب وفلول
احب اقول ان اللى شاركو في الثوره لا يتعدو 15-10 % من الشعب المصري

يعني لو الفلول 10 % والباقي أغلبية صامتة يبقى نروح نولع فى نفسنا بجاز

ليه؟؟

لأن الخوف إننا نفقد تأييد الأغلبية الصامتة لينا
لينا ؟؟ احنا مين؟
احنا الشباب اللى طلع عين امه في فترة ما قبل الثورة
وكان بس دوره شرارة الاشتعال

لكن من غير الشعب اللى قام بالثورة (واللي مكانش ليه فى السياسه قبل كده)ولا كان هيبقى لينا اى لازمه
كان زماننا على أحسن تقدير بيجرو ورانا واحد واحد فى المعتقلات

بنقول من الأول تاني أهو عشان مفيش حد يشتم فيهم

أو يقلل من دورهم

طب إيه اللى يخلى الناس تفقد إيمانها بالثورة؟
او بالأحرى تقول خلصونا بقى ولما تشوف حد فينا بدل متشكرنا تشتمنا

ممكن نعدد شوية اسباب:

1-تشتت وتفكك القوى السياسية 

ومن غير منقول مين غلط ومين صح
ومش قصدي على جمعة 27 بس ، ده من يوم الاستفتاء
التشتت قدام الناس بيبقى اول شئ يبث الاحباط فيهم
ويخلى عزيمتهم تخور .. والاختلاف مش فى المواقف بس
ده كمان اختلاف في الاهداف صعد بسقوط مبارك
اللى كان هدف واحد (زي شبكة فودافون وتأهل مصر لكاس العالم) مجمعنا كلنا

2-حماس بعض الشباب الزائد

عن الحد وعدم فهمه لمعنى ان الثائر يجب ان يعرف متى يتوقف والا هيبقى متمرد وهيفقد مؤيديه
"اتذكر ان جيفارا بعد مقام مع كاسترو بالثورة فى كوبا
مقدرش يستمر فى منصبه كوزير
لأنه عرف انه ثائر بطبعه .. مش بتاع قعدة على مكاتب وخطط تنمية وبناء
فسافر لافريقيا لقتال الدول الاستعمارية ورجع بعدها لبوليفيا حيث أُغتيل من القوات الامريكية
فياريت اللى عايشين دور جيفارا يعرفو نفسهم ولو هما من النوع ده ممكن ياخد سلاح ويروح ليبيا
بدل ميبقى وجوده خطر على الثورة"

3-عدم وجود قائد للثورة

وظهور العديد من الائتلافات او بمعنى اصح الاختلافات

لم يعد الناس يعرفون إلى أين يتجهون, أو كما نقول بلغتنا: لم يعرفوا لأي قديس يضيئون الشموع

ترددوا ثم توقفوا وانتهى بهم الأمر إلى أن يتفرقوا 
والنتيجة: عدد هائل من المحبطين وخائري الهمم

الفقرة دي من رواية مؤذن الكيت كات 

 مش عارفين مين الصح اللى ثار عشانهم فيقفو وراه ويساندوه للأخر

4-سقوط الحكم في يد القوات المسلحة
التى يشعر الشعب نحوها بثقة عمياء.. ده غير فى اللا وعي عنده عارف مغبة الوقوف ضدها
"دي العامود اللى واقف عليه البيت"
فبالتالى اى نقد بيوجه للجيش بيتم تخوين من يقوله من غير ميشوفو كلامه حقيقي ولا لا
واى نقد ده بيشمل ابسط الحاجات زى محاكمة الناس محاكمات عسكرية ولحد المطالبة بمجلس رئاسي

5- دعوات الاحباط التى يتم نشرها عن طريق الشباب قبل التيارات المناهضة للثوره أصلاً
تلاقى ناشط معروف يقولك احنا اتضحك علينا
او يا ثورة ما تمت
او كل سنة وانتو طيبين نشوفكو الثورة الجايه
وكلام أهبل بيضر اكتر ما بيفيد
انا ضد ان واحد يقول ان الثوره اكتملت لانها لسه محققتش كل اهدافها
بس ضد اكتر اى واحد يقول انها فشلت او محققتش حاجه

يعني اللى بيقول احنا اول منزلنا طالبنا بحد أدنى للأجور والغاء قانون الطوارئ
ومحققناش حاجه فيهم

طب مسيادتك انت من تاني يوم لما شوفت الاعداد دي ارتفع سقف مطالبك
لرحيل الكلب مبارك

والكلب رحل
وولاده الاتنين في السجن
يعني جبت الهدف الاعلى متجيش تتغابى وتقول فاشله
متحبطش نفسك وتحبط جموع الناس معاك

ولو عايز نتكلم بجد
تعالى شوف التطورات اللى عملناها في عيش،حرية،عدالة اجتماعية
اكتفاء ذاتي من القمح في اول سنة
حرية اعلامية اه موصلناش للماكسيمم وفي تابوهات زي المجلس
وان كانت فى ناس طيرتها زي عيسى وبلال فضل ونوارة ويسري فوده
 الصح تسال نفسك
انت بتتقدم ولا بتتأخر في مجال الحريات دلوقت؟؟
اترك الاجابة لك

6- نجاح بعض سيناريوهات الثورة المضادة 

أزمات مفتعلة غير حقيقة زي السولار وازمة انابيب البوتاجاز
و استمرار بعض قوى الأعلام المضاد لإشعار الناس بالفوضى والإنسياق لمستقبل أسود مجهول
زى المحور والفراعين
توفيق عكاشة بتاع البط
وأحمد زبايدر
زينة شباب الثورة المضادة

دي ابرز الاسباب اللى بتمثل خطر اننا نفقد التاييد للثوره
واللى المفروض نقف مع بعض ونشوف نواجهها ازاي لو عايزين نبقى أحسن
والثورة تكتمل وتعمل النقلة اللى محتاجينها

ياريت لو حد شايف اسباب تانيه يقولى فى كومنت برضه

والله الموفق

حـسـام حـسـن

خالد سعيد..في ذاكرتنا للأبد

   6-6-2010

وفاة شاب على يد اتنين مخبرين ليحيى الاف الشباب
دق لديهم ناقوس الخطر ليعلمو ان حياة كل واحد منهم قد تنتهي في ريعان شبابه

على يد 2 مخبرين

قصتى مع خالد سعيد بدءت عندما رأيت على بروفايل د-أيمن نور على الفيس بوك صورة مشوهة لجثة
قرءت فى اليوم التالى حكايته

شاب سكندري عندما ترى صورته تقول ماشاء الله،ما أحسنه
وعندما ترى صورة جثته تشعر بصدمة
هل حقاً هذا هو نفس الشخص!!؟؟


وبدءت حمله شعواء من كل الجرائد الحكومية على هذا الشاب متهمينه
بتجارة المخدرات وسوء الاخلاق وانه لديه سوابق جنائية

وحملة مضادة من الشباب - افخر انى كنت واحد منهم - لمواجهة وحشية الداخلية

6-6-2011

ادخل على موقع الاهرام لأرى صورته تتصدر الموقع

وخبر يظهر ان صفحته التى يتجاوز عدد مشتركيها المليون و400 الف
قد اشادت بوضع جريدة الأهرام لصورته!!

في ذكرى إستشهاده
لا يمكنني ان اقول سوى سبحان مغير الاحوال
استشهد شاب ليحيي الالاف

رحمة الله عليك يا خالد سعيد

Visca el BARCA

نهائي دوري ابطال اوروبا 2010-2011
مانشستر يونايتد(الانجليزي) ضد برشلونه(الاسباني)

ستاد ويمبلى - لندن
3-1

:وعن ميسي قالو
"Lionel is the best player I have seen and probably the best I will ever see."
Barcelona coach Pep Guardiola

بكره تضرب مخدرات يا عرص
حازم كرم

 استمتعت بالماتش واستمتعت اكتر بالفرجه عليه مع حازم وحلمى وشرف وابوسريع وعمرو زكي
وفرحان ان مانشستر خسر لانهم لو كانو فازو كان زمان عمرو قعد يبيض عليا لحد السنه الجايه

الماتش في اربع صور

goodbye lullaby

Avril's last album is so good,that i thought i must write about it
all the tracks are awesome

i recommend it to every friend of mine

almost half the year passed without releasing any cool albums

but this one is the best so far

avril also shooted 2 video clips from this album
What The Hell
i'm not so much into this one :(
& Smile

and another 2 were released before
Bad Reputation in kick ass
& Alice in alice in wonderland

my favorite song in this album is What The Hell
the acoustic version

You Really Should Listen To This Album

نحن لا نطلق الرصاص

بسم الله الرحمن الرحيم

النهارده 23 مايو .. يوم التدوين على المجلس العسكري .. الساعة دلوقت 8:10 الصبح ومقريتش اى حاجه لحد دلوقت غير هجوم هجوم
بعضه موضوعي وحقيقي والبعض الاخر محض أوهام وخزعبلات

هبدء بحوار
بين (ا) و (ب) .. اتنين مصريين اصدقاء واخوات،رفقاء كفاح
شافو مع بعض كتير اوي وكل واحد فيهم عارف ان التاني اهم حاجه عنده مصر

(ا)
انا عايز مجلس رئاسي مدني .. خلاص فاض بيا من الجيش
كلهم بتوع مبارك،وبيقولك ثورة مضاده وهما اصلا اللى عاملين الثورة المضاده

هعددلك مواقفهم من الاول:

-موقعة الجمل لما وقفو يتفرجو على المتظاهرين وهما بيموتو وسابو بلطجية النظام يدخلو عليهم الميدان

- طنطاوي حبيب مبارك وصاحبه الروح بالروح اكتر من 20 سنه وكل قيادات الجيش اللى معينهم مبارك

-بعد تخلى مبارك عن منصبه لما ضربو المتظاهرين عشان كانو بيطالبو برحيل شفيق .. وهما كانو بيحموه عشان بيحمو الفساد
وشفيق لسه متحاكمش لحد دلوقت بسبب اللى عمله
-فى 9 ابريل لما ضربو الشباب فى التحرير ووفاة على ماهر 19 سنه والقبض على الظباط اللى تمردو

-سكوتهم على مبارك اكتر من شهرين خلوه يلم ورقه ويهرب فلوسه ويمسح اثار فساده
وهو نفس التباطؤ اللى عملوه مع سرور والشريف وعزمي

-في الاستفتاء لما كانو مايلين لنعم للتعديلات الدستورية وكلام ممدوح شاهين،الشعب قال نعم للمجلس العسكري

-وقفتهم يتفرجو على كنيسة امبابه وهى بتولع والاستباكات بين المسلمين والمسيحيين عشان هما عايزين الفتنة

-مبارك اللي متسجنش لحد دلوقت وعايش حياته في شرم الشيخ على حسابنا

-المحاكمات العسكرية فى حق المدنيين وخاصة اللى كانو عند السفارة .. ودفاعهم المستميت عن سفارة اسرائيل يوم الزحف
-واخيرا واللى اكيد مش هيبقى اخر حاجه لو سكتنا هى قبولهم بالمصالحة مع سوزان مبارك

ان الجيش مش هو المجلس ولازم الناس تعرف كده .. المجلس قيادات ولائها لمبارك .. الجيش انا وانت واخواتنا

تفتكر هستنى ايه بعد كل ده
انا لازم انزل يوم 27 واقول لا .. انا عايز مجلس رئاسي مدني

يسقط يسقط حكم العسكر
......................................................................

(ب)

انا ضد مجلس رئاسي مدني .. وشايف ان مصلحتنا حتى الانتخابات فى سبتمبر ان المجلس عسكري يكمل

اولاً المجلس العسكري مش وحش زى مانت متخيل

وفي نقط مينفعش تنساها

 ان اجتماعهم يوم الخميس 10 فبراير واصدارهم اول بيان بدون القائد الاعلى هو انقلاب عسكري

يعني وهما قاعدين فى اجتماعهم اليوم ده لو كان دخل الحرس الجمهوري صفاهم كانو بقو شوية خونة وتم اعدامهم

وده الكلام اللى اكده عبد العزيز الجندي وزير العدل الحالى ان مبارك تم عزلة ومتخلاش عن السلطة بارادتة

فالناس دي خدت جنب الثورة فعلا

ومن كلام محمود سعد .. وعن اللى اتقال عن عبد اللطيف المناوي ان مبارك عزل طنطاوي فى يوم 10 فبراير لكن المناوي مذاعش البيان وبعته للجيش وده اللى خلى الجيش ميحاكمهوش وسابه يسافر

ان قيادات في الجيش كانت ضد التوريث من قبل اصلاً الثورة متقوم وده اكدته وثائق ويكليكس

حتى لو كنت شايفهم ضربونا عشان شفيق يوم 26 فبراير .. فلو تفتكر انهم لما قعدو مع البرادعي وعدد من الشخصيات السياسيه-

 سألو مين الشخص اللى الشباب عايزينه يشكل الحكومه ولما عرض عليهم الاسماء اختارو اول اسم اقترحه شباب الثورة وهو عصام شرف
فى يوم تكليف عصام شرف بتشكيل الحكومة أعلن البرادعي ان الثورة انتهت وحان وقت البناء
وان نظام مبارك خلاص سقط واحنا على الطريق السليم

-ان الجيش لو عايز ميحاكمش مبارك مكانش حطه تحت الاقامة الجبرية
أيوه بالعقل كده .. فاكر لما كانت بتطلع تقارير عن ان مبارك راح تبوك
وانه هرب وكلنا سكتنا واغلبنا اعتقد فعلاً انه هرب

لو كان المجلس ليه نيه لحمايته مكانش قعده هو وولاده تحت الإقامة الجبرية فى شرم الشيخ

 

لو كان المجلس فعلاً متواطئ وعايز يرجعلك الدستور القديم فكان ممكن يرجعهولك بعد الاستفتاء
لما الشعب 77% منه قالو نعم على التعديلات
يعني لو كانو فعلا عايزين يحافظو على نظام مبارك كانو قالو ادى اللى الشعب اختاره وجابولنا الدستور القديم
وساعتها اللى هيفتح بوقه او يعترض كان هيتفشخ باسم راي الاغلبية والديموقراطيه وكان هيبقى معاهم حق
لكن مع ذلك عملو اعلان دستوري ومرجعوش الدستور القديم رغم انه كان بايديهم

انت شايف ان المحاكمات العسكرية ضد الشباب عند السفارة كان مبالغ فيها

ولكن انت بتتعامل مع المؤسسه العسكريه .. هنا مفيش هزار

والاحكام كلها كانت مع ايقاف التنفيذ

هل الجيش حاجه والمجلس حاجه؟

اختلف معاك .. لان المجلس 18 قيادة بتمثل مختلف قطاعات الجيش

لو قولت 2  او 3  او 4 فاسدين لكن متقدرش تقول كله مش بيعبر عن الجيش

.............................................

دى كانت النقط الأساسية في الحوار بين الصديقين
ويمكن فى اكتر بس مش عاوز اكتب اكتر من كده
انا معنديش وقت اكتب .. وانت معندكش وقت تقرء
ده عصر السرعة

"المجلس ليس ثوريا، يقود شعب ثائر، بسبب ان الثورة لم يكن لها قيادة منذ البداية، ازمتنا فرق سرعات،العقليات مختلفة وليس النوايا من وجهة نظري" أحمد رجب

يمكن الجملة دي بتلخص كتير

وحط عليها ان فعلاً راي الشارع هيكون ضد اى حد يطالب بمجلس رئاسي مدني لأنهم مش بيثقو في اي شخصية سياسية

ولأن كل الشخصيات السياسيه اللى نزلت الشارع البعض هاجمها بشراسه زي البرادعي وصباحي وحتى عمرو موسى
يعني اى مجلس رئاسي .. هنلاقيه كل اسبوع في التحرير مليونية لإسقاط واحد فيهم

إلا بقى لو عملت مجلس رئاسي فيه اكتر من 100 شخصيه عشان يبقى مثلت كل التيارات وده هيبقى سيرك مش مجلس

نقطة مهمة تانيه هي هيبة الجيش
|ممكن تشوف ان الجيش اهم حاجه هيبته برا مصر وسط جيوش المنطقة لكن بالنسبالي هيبتة جوا مصر دلوقت أهم

شوية سلفيين كاتبين ان اللى هينزلو يوم 27 هما العلمانيين والليبراليين والكفرة والملحدين

 انا وجود الجيش فى الحكم بالنسبالي هو العامل الاهم للسيطره على قوى الظلام دي اللى ممكن تثير الشارع وتعمل مظاهرات ضد اى شخصية مدنية فى مجلس رئاسي واكيد ان كلهم هيكون ارائهم ضد السلفيين وحركاتهم

وان اراء النشطاء واعتقادهم انهم رايهم من رأي الشارع اتضربت فى العديد من المواقف زي الاستفتاء
فمتقولش مجلس رئاسي مش هيوافق عليه غير اقل من اللى قالو لا وانا منهم

وفي النهاية انا بقول اني نازل يوم 27
عشان ازق المجلس واخليه يتحرك واثبت ان الثوره مستمره

لكن مش علشان اقوله أرحل

وبرفض مصطلح الثورة التانيه
هي الثوره  مستمره

السماح بتصويت ظباط الشرطة..ده معانا ولا ضدنا

بسم الله الرحمن الرحيم

هبدء بحكاية صغيره

من اكتر الناس اللى كافحت معانا من اجل التغيير واتشرفت انه كان معايا يوم 25 المقدم محمد محفوظ

اللى هو دلوقتي فى ائتلاف ظباط الشرطة وبيحاولو يصلحو منظومة الشرطة

المقدم محمد محفوظ كان مسئول العلاقات العامة بمكتب مدير امن اسكندريه..وتم فصله من عمله في 2009 عشان رفع قضية

القضيه كانت للسماح لظباط الشرطه بالتصويت فى انتخابات الرئاسة..عارفين ليه اتفصل؟ 

عشان كانو شايفين ان الظابط لازم يبقى جزء من النظام

مينفعش الظابط يبقى ليه صوت او يصوت لأي مرشح

كون ان الشرطه مبيصوتوش فى الانتخابات ده بيرسخ جواهم انهم جزء من النظام

دورهم الدفاع عنه مش الدفاع عن الشعب

تفتكرو لو ظابط انتخب د-أيمن نور في 2005 كان هيدافع عن النظام

 او يطارد واحد فى حزب او حركة بيطالب بالديمقراطية

سؤال كمان

هل لو تصويت الشرطه كان بيصب فى مصلحة النظام..كان مبارك وكلابه هيمنعوهم من التصويت طول فترة حكمه؟؟ ويفصلو اللى يطلب ذلك؟؟

معظم الدول الديمقراطيه في العالم الظباط ليهم حق التصويت عادي

اللى هو حق كفلة الدستور اصلا

لكن تم منع رجال الشرطة منه في قانون الحقوق السياسية

وده زي مقولت عشان يضمنو ان ولائهم للنظام وللرئيس فقط

طب هل كونهم يصوتو مش هياثر في مسار العملية الانتخابية

لا

لأن الشرطة بتأمن المقار فقط...الاشراف على الانتخابات من الهيئة القضائية

ورجال القضاء مالهمش حق التصويت

القرار كان تعديل قانون مباشرة الحقوق السياسية

والسماح بالتصويت لرجال الشرطة والجيش والمصريين بالخارج

ليه بقى الناس أغلبها مش عاجبها القرار

مش عارف

بس أعتقد عشان احنا بنكره الشرطه وشايفينهم ولاد كلب فلازم لو صوتو هيعملولنا كارثة

عشان كده معظمنا خد موقف سلبي من القرار من غير ميفكر كويس فيه

ده غير الهجوم الشنيع على شرف اللى احنا مشوفناش منه غير كل خير

المقدم محمد محفوظ معاهم
لحد7-2009

المقدم محمد محفوظ معانا
في حزب الجبهة
يوم 7 اكتوبر 2010

وفي النهايه اسيبكو مع الخبر ده

 والبيان ده

................................................
تحديث

يا فرحة ما تمت...ممدوح شاهين لسه نافي الخبر على اون تي في

دولة قمعستان

هل تطلبون نبذة صغيرة عن أرض (قمعستان)

تلك التي تمتد من شمال افريقيا

إلى بلاد نفطستان

تلك التي تمتد من شواطئ القهر الى شواطئ

القتل

الى شواطئ السحل, الى شواطئ الاحزان ..

وسيفها يمتد بين مدخل الشريان والشريان

ملوكها يقرفصون فوق رقبة الشعوب بالوراثة

ويفقأون أعين الأطفال بالوراثه

ويكرهون الورق الابيض, والمداد, والاقلام بالوراثة

واول البنود في دستورها:

يقضي بأن تلغى غريزة الكلام في الإنسان

الله ... يا زمان ... 

الرائع

نزار قباني

بقية القصيدة

علموني - فيروز

ايه الصوت ده؟؟

ايه المكان الخطير اللى اتصور فيه الكليب ده

انا نفسي ازوره لما اروح لبنان

بجد يا فيروز علمتينا كل حاجه

الكنيسة والبابا ومصر

ده كان من اكتر الموضوعات الشائكه في مصر زى كامب ديفيد وعلاقتنا باسرائيل كده

بس بعد الثوره

ليس هناك خطوط حمراء ولازم نقف قدام المرايه ونواجه مشاكلنا بجد

عن علاقة الكنيسه بمصر

اولا انا شخص مسلم ليبرالي مؤمن ان كل المواطنين متساويين

مفيش فرق بيني وبين اي مصري تاني سواء كان مسيحي او ملحد او يهودي او اى ديانه يحبها

وعشان كده بنظر للامور من الخارج

مشكلة الكنيسه فى وجهة نظري انها بتعتبر نفسها كيان مستقل رئيسه البابا وهو سفيرها لمصر

واغلبية المسيحيين بتتعامل معاها بالمبدء ده

يعني علاقتهم ورئيس جمهوريتهم هو البابا وخاصة في الامور السياسيه

واي حاجه البابا هو اللى بيتولى تخليصها مع الحكومه او مع الرئيس المخلوع

مع إشعارهم بصفه دائمه انهم مالهمش غير الكنيسه وان الرئيس المخلوع هو اللى كان بيحميهم

لكن الاذكياء مخدوش بالهم ان الفقر مش بيفرق بين جيب مسلم وجيب مسيحي

وان الجوع لما بيقرص مش بياخد باله من دي بطن مسلم ولا مسيحي

ولما بتاخد على قفاك برا ومحدش يقولك انت فين وتروح السفاره متفرقش معاهم انت مسلم ولا مسيحي

عشان كده استجاب لدعوة التغيير و لثورة 25 عدد كبير منهم

رغم ان الكنيسه دعت الشباب لعدم الخروج وأيدت نظام مبارك (زي الأزهر )

لكني فرحت بكل واحد بجد خرج

لان ده كان بيتحدى الكنيسه قبل مبيتحدى النظام

زينا لما خرجنا تحدياً لشيوخ "لا الخروج على الحاكم"قبل منتحدى النظام

لكن هما كانو افضل لان كل واحد كان بيتحدى الكنيسه اللى مفهماه ان من غيرها يضيع

وعشان كده له فاكر قعدتي فى الزنازنه مع جون وبيتر

الزنزانه في يوم 26 مفرقتش بين مسلم ومسيحي

فى الوقت الحالي انا يوم عن يوم بانبسط

بسبب ان كل يوم بيزيد وعي النا وابتدى كتير منهم يفهم انه جزء من الدوله

وانها ملكنا كلنا

وهو زيه زيي ... مصر اللى بتحميه واللى هتحميه مش الكنيسه

عشان كده انا مبسوط اوي من انشاء نجيب ساويرس لحزب سياسي

ومن بداية خروج المسيحيين من عباءة الكنيسه الى نظام حزبي قوي

زي فرحتي بخروج كتير من الشباب من عباءة الشيوخ المتحولين وانضمامهم لاحزاب

الحل دلوقت اننا نعرف ان مصر بتاعتنا مسلمين ومسيحيين

ولو هنفضل منتمين لهياكل دينيه امن الدوله المنحل اخترقها للنخاع يبقى هنخسر كتير

وانا بقول لكل اصحابي واخواتي المسيحيين و المسلمين

كل شخص هيختار يقفل على نفسه الدايره

عمره مهيحس ان دي بلده وهيعمل تربه احسن للفتنه تعيش فيها

مصر بلدنا وكلنا شوفنا موقف البابا وموقف شيخ الازهر من الثوره

وموقفهم بعدها..كانو لعبة فى أيدي النظام

كنا فى التحرير من غيرهم..واحنا اللي حمينا بعض

خلو الصوره دي دائماً في ذهنكم

ودي انا اللي مصورها بنفسي في الميدان

مصر - تدليل الأطفال المبتسرين في مستشفي الشاطبي

  مصر - تدليل الأطفال المبتسرين في مستشفي الشاطبي

الاهرام

البرادعي والإخوان

تفتكرو الاخوان هيأيدو مين فى انتخابات الرئاسه؟؟

سؤال تقريبا بيتسال كل ساعه وكل يوم

خلونا نتفق بس الاول حتى ان كنت من اشد كارهي الاخوان فانت برده عارف الفرق اللى هيعملوه لو أيدو مرشح بعينه

خاصه انهم اكتر تيار سياسي ليه تواجد فى الشارع
وبيعرف يتكلم وفاهم لغة المواطن البسيط

نرجع بقى للسؤال

الاخوان هيأيدو مين..بالاصح شايفين مصلحتهم مع مين اكتر؟؟

لو بصينا على الاسماء المطروحه بقوه دلوقت للرئاسه

وان كلهم من تيارات لا تنتمي للاخوان

عدا عبد المنعم ابو الفتوح اللى كان جزء منهم وانشق

فاحنا هنلاقي الاتي .. الإخوان اولاً صرحو انهم مالهمش مرشح رئاسي

ثانيا هيصرحو انهم لن يدعمو شخص بعينه فى الانتخابات

كل ده (رسميا)..إنما على الارض نبقى ساذجين لو افتكرنا ان الاخوان هيقعدو فى مقراتهم ويسيبو اللى ينجح ينجح

بشوية منطق هنلاقي ان الاخوان لازم هيأيدو مرشح يضمنلهم المكاسب اللى حصلو عليها من بداية الثوره ولحد دلوقت واللى جايه فى الطريق وخاصة البرلمان

يعني هيدورو على واحد بيثقو فيه..واحد عارفين انه لو مسك الحكم مش هيقلب الاعلام ضدهم ويشوه صورتهم ولا يبدء يحاربهم ويشوط فيهم زي النظام السابق

طبعا بعد الثوره كل القوى السياسيه بقت تحترم الاخوان وكل مرشح رئاسي بقى بيعظمهم لما تيجي سيرتهم

لكن معتقدش انهم برياله

وعشان كده دي اول حاجه بتخليني اعتقد فى ميلهم للبرادعي

لاننا لو رجعنا بالزمن شويه ولقينا ان من اكتر من سنه اول واحد قال ان مينفعش الاخوان يبقو جماعه محظوره وهما ليهم 20% من البرلمان

والا يبقى انت بتحظر حوالى خمس الشعب المصري..ده كلام شخص فاهم يعني ايه ديمقراطيه

ده كلام البرادعي

لما رجع البرادعي وبدءت القوى الوطنيه تتوحد وعملت الجمعيه الوطنيه للتغيير

الاخوان انضمو ليها .. فى اول خطوه فى تاريخهم ينضمو فيها لكيان اكبر عشان هدف موحد

وجولات البرادعي كان بيشارك فيها الاخوان بقوه

تأييد الاخوان للبرادعي في الفيوم ..ابريل 2010

"وجلس بجوار البرادعي على المنصة في مؤتمر جماهيري بعد صلاة الجمعة عضو مجلس الشعب مصطفى عوض الله المنتمي لجماعة الإخوان، والعضو القيادي في الجماعة الأحمدي قاسم"

وكان فى التاسيس بتعها سعد الكتاتني رئيس الكتله البرلمانيه للاخوان اكتر من 80 نائب بمجلس الشعب

ده قبل انتخابات 2010

بعدها اول مره واحد يحترمهم ويروح لحد عندهم

اللى قال فيه انهم اكبر حزب لاحظو ان الكلام ده قبل الثوره بسنه

ايام مكان الكل بيضربهم بالجزمه واحد بس كان معاهم

د-محمد البرادعي فى مؤتمر مع الكتاتني مره تانيه

يونيو 2010

المؤتمر الهام اللى بعده بدء الاخوان جمع توقيعات على بيان التغيير

ولو تفتكرو الفرق اللى عملوه فى عدد التوقيعات على بيان التغيير

اللى خلاه يعدى مليون توقيع

كفايه كده فى القديم...ندخل على ثورة 25

عوده البرادعي يوم 27 الخميس للمشاركه فى جمعة الغضب

كان فى انتظاره بفيلته

عصام العريان وسعد الكتاتني

الموضوع ليه بقيه وكل دي توقعات وتخمينات انما الواحد شاف عدة دلائل

البرادعي والاخوان ..تحالف أسسه النظام فأسقطه

غلاف جريدة المصور

volunteers in shatby

الحمدلله ربنا وفقنا كطلبه فى موضوع الشاطبي

وقدرنا نساعد

بدء نزول متطوعين من السبت اللى فات

وان شاء الله هنفضل نساعد فى كل حته لحد مصر كلها متبقى احسن

الشباب هو الأمل

Freedom

الحريه

احساس محدش يقدر يتكلم عليه غير لما يفقده

  حسيت معنى الكلمه دي فى فجر 27 يناير

بعد ليله منمتش فيها بسبب برودة الجو وخشونة ارض الزنزانه

وولاد الكلب مشغلين المروحه فى عز يناير 

وطول الليل اروح اقف جنب الباب الحديد

مستني حد ييجي يقول هتخرجو دلوقت ومستني الصبح يطلع يمكن ادفا

وبفكر يا ترى ماما عامله ايه دلوقت؟؟ :(

ولما الفجر طلع والنور بدء يظهر

بصيت من ورا القضبان لفوق

عشان كنا محبوسين تحت الأرض وعلشان تشوف من اشباك لازم توطي وتبص لفوق

لما ساعتها بصيت على السما وشميت هوا الفجر

ساعتها بس عرفت معنى الحريه

وكان واقف جنبي جون ساعتها وقولتله انا اول مره اشوف السما حلوه كدا

^_^

New Day Has Come

ده كان عنوان بوست ليا ع المدونه من من سنه تقريبا

اول مالبرادعي احيا الأمل فيا

بس لازم أعيده تاني دلوقت

الأرض دي أرضي

جمله ياما سمعتها

بس الحقيقه معرفتش معناها غير يوم 25 يناير الساعة 5 المغرب

تحديدا لما مشينا فى شارع جمال عبدالناصر وحسيت ان الشارع ده ملكي

انا عمري محسيت ان البلد دي بتاعتي بس اليوم ده لما مشينا فى الشارع واخدينه كله 

اكتر من 10000 مصري حر

ولما شوفنا الامن المركزي بيهرب قدامنا واحنا بنجري وراه

مشينا فى الشارع لحد سيدي جابر وانا حاسس ان كل جزء فى الشارع ده بتاعي

شبر شبر ..دار دار ..زنقه زنقه

 "اقتباس من ابن المجنونه"

من يوم 25 وانا حاسس ان كل جزء فى البلد بتاعي

انا دي بلدي بجد ولازم اموت دفاعا عنها

امبارح كنت فى مكتبه اسكندريه

المفروض وانا خارج باللاب توب بيكون في واحد يشوف السيريال نمبر على الكارنيه وعلى اللاب عشان محدش يسرق واحد بتاع حد

خرجت من الباب وملقتش حد بيفتش قمت راجع تاني لحد الامن وخليت الراجل يدور على الموظف ده ملقهوش

قولتله معلش هنتعبك بس اقف لحد المكتبه متقفل (كان فاضل حوالي نص ساعه وتقفل)وفعلا الراجل ابتسم ووقف يفتش رغم انه مش شغلته

واحد ماشي بعربيته وحدف كيس من العربيه وهو ماشي

روحت لنص الشارع وخدت الكيس رميته فى الزباله

انا مش بطل ولا بستعرض.. كلنا بنعمل الكلام ده من يوم 25

دى مواقف بتعبر بس

مفيش رجوع وسلبيه تاني

اه .. الثوره مغيرتش ناس كتير

بس اعتقد ان في 10% من الشعب اتغير والباقي تدريجيا هيتغير

لما يشوف الايجابيين دول وسطه وهيزيدو يوم بعد يوم

مصر بتتولد من جديد

دفاعاً عن الدين

بسم الله الرحمن الرحيم

امبارح شوفت فيديو غزوة الصناديق لمحمد حسين يعقوب

ومش هتكلم عنه لان خلاص كل الناس اتكلمت عنه

 نذكر بس انه شايف ان الناس قالت نعم للدين...على اساس ان اللى اختار لا كانو بيقولو لا للدين.

وامبارح برده شوفت القذافي بيموت فى شعبه لحد مالناس بقت بتبوس رجل الدول الغربيه انها تتدخل
وتنقذ الشعب الليبي من المجنون الدموي ده.

ويطلع ع التلفزيون الليبي يقول يحيا الاسلام..يحيا الاسلام

انا بواجه الاستعمار الصليبي

امبارح برده شوفت القرضاوي بيتكلم عن القذافي والعمليات العسكريه فى ليبيا وهو كان كفره هو وجدى غنيم قبل كده واهدرو دمه

باسم الاسلام

وبرده شوفت النهارده على التلفزيون الليبي شيخ طلع شبشب القرضاوي وكفره

وقال انه افتى بقتل المدنيين اللليبيين الابرياء باسم الحمله الصليبيه

والشيخ قال ايات فى القران واستخدم الدين فى مهاجمة القرضاوي

من كام يوم شوفت عبود الزمر بيتحدث على العربيه وقال انه مش ندمان على قتل السادات وطالب بوجود لجان متخصصه للتكفير

وتحدث عن رؤيته للاسلام والدوله وقال انها رؤيه معتدله!!

ده غير طبعا رؤية الاخوان ورؤية الجهاد ورؤيه الصوفيين والجمعيه الشرعيه

باختصار كل واحد شايف الاسلام من وجهة نظره

وكل واحد شايف انه كده بينصر الدين

يعني القذافى بيقتل شعبه وبيقول انا كده بنصر الاسلام

والقرضاوي بيكفر القذافي ويامر بقتله وهو كده بينصر الاسلام

انا بقى بنصر الدين

ايوه بنصر الدين بالدعوه لليبراليه وفصل الدين عن السلطه ولكن ليس فصله عن الحياه

انا شايف ان احلى مناخ الدين ينتشر فيه هو مناخ الحريه

ده الشئ الوحيد اللى يخلى الناس تبص على الاسلام وتقتنع بيه 

وشايفين تركيا مثلا

حزب العداله والتنميه ورجب طيب اردوغان

وازاى ان حزب ذو مرجعيه اسلاميه قدر يقود البلاد للتقدم ويفرض على كل الناس غير المسلمين قبل المسلمين احترامه

وازاى انه الدوله الوحيد اللى تصدت لاسرائيل وفكت حصار غزه باسطول الحريه
والعرب المسلمين قعدو يحلفو بشجاعته ويلعنو سلسفيل ابو حكامهم ودولهم ام الماده التانيه

تخيل معايا واحد اوروبي او امريكي او افريقي او اسيوي

واغلبهم ملحدين

فكر فى الاديان وبدء يقرء

ولقى عنده نموذجين نموذج تركيا

الدوله العلمانيه

ونموذج السعوديه

الدوله الدينيه

(اللى الدين فيها على مزاج الملك)

تفتكر انهى نموذج يقنعه اكتر؟؟

ادخال الدين فى السياسه هو اكتر شئ بيسيئ للدين

لانه بيتم استغلاله كل واحد ووجهة نظره وانا قولت نموذج القذافي والقرضاوي موقفين عكسيين تماما

والاتنين وياللعجب بينصرو الدين !!

وساعتها الدين هو اللى بيتحاكم

يمكن عشان كده بحب الاخوان لانى واثق انهم لو مسكو الحكم هيلجأو للنموذج التركي
ومش هيغامرو ويعملو زى ايران مثلا

انا ليبرالي وشايف ان دى افضل طريقه للدين

من حقك تبقى متدين لكن متفرضش رايك على الناس او تستغل الدين فى السياسه

وانا بعمل كده دفاعا عن الاساءه للاسلام من قبل الاشياء اللى بتفسر الدين على هواها وتسخره لخدمتها ومصالحها الشخصيه

حـــــــــريــــــــــــــه