The bourne trilogy

قبل منبدء بس شغل دى وانت بتقرء
عشان تدخل معايا جو الفيلم



فى افلام كتير لما اتعملت فى سلسله من كذا جزء حققوا نجاح رهيب

وهيفضلو فى ذاكره الناس للأبد وكمان فى رصيد الممثل

بحيث لما بيحس انه اتزنق وعايز يرجع شعبيته تانى وسط الجمهور بيرجع ويعملهم جزء جديد

زى rocky وزى pirates of the caribbean

بس البوست ده هتكلم عن الفيلم اللى صنع شهره Matt Damon

الفيلم اللى جسد تانى احسن رواية جاسوسيه فى القرن الماضى.

فعلا اللى ناس كتير متعرفوش،ان روايه الفيلم هى تانى احسن رواية جاسوسيه فى القرن الماضى

تم تاليفها بواسطه Robert ludlum  فى 1988

.................................

الجزء الاول

  The bourne identity

انتاج سنه 2002

وتم فيه حذف جزء كبير من القصه الاصليه..عشان تواكب الزمن الحاضر

ودى بدايه الحكايه شخص فاقد الذاكره يصحى يلاقى نفسه على ظهر مركب للصيد والناس انتشلوه من البحر وولا هما وولا هو يعرف عن نفسه حاجه

فقط لقى فى جسمه رقم حساب بنك ومن هنا هتبدء الاحداث عشان يكتشف هو مين

انا مش هحرق الاحداث بس الفيلم ده ..كجزء اول اديله اضعف راتينج وسط التلاته

يمكن لان المخرج مكانش اد كده ويمكن عشان Matt Damon كان لسه فى بدايته..اديله راتينج مثلا 7.5/10

............................

الجزء التانى

The bourne supremacy

أنتاج سنه 2004

 فى الجزء ده بيدخل العبقرى اللى قلب الفيلم واعتقد انه هو اللى ادى لشهره بورن وانقاذ ان سلسه رائعه زى دى وروايه تحفه تروح هدر

المخرج Paul Greengrass 

وده مخرج بريطانى وتعاون مع Matt damon بعد كده ...واضح ان حصل بينهم تفاهم كبير

فى الفيلم وعشان منحرقش الاحداث بيرجع بورن لاوروبا مطارد برده بالذكريات بعد مكان هربان فى الهند وبتدخل شخصيه مهم جدا لسير الاحداث

Pamela landy

اللى بتمسك ملف بورن فى المخابرات المركزيه

الفيلم ده صراحه بيعجبنى جدا بسبب التصوير الخرافى وتحس فعلا بدور المخرج فى الفيلم لما تشوف الفرق بين ده و bourne identity

حتى فى تتابع الاحداث وتشويق المشاهد

بالنسبه لى هو احسن واحد فى التلاته

الفيلم اديله راتينج 9/10

..................

الجزء التالت

The bourne ultimatum

انتاج 2007

التعاون التانى بين Damon وgreengrass

بورن فى اوروبا وافريقيا والاخر بيرجع لامريكا عشان يكتشف بدايته وازاى بقى كده

الجزء ده رهيب جدا

Julia stiles فيه بترجع تاخد حقها اللى مخدتوش فى اول جزئين

وبعتبر اخر ربع ساعه فيه مالهاش حل..ومشهد النهايه هو الاحسن

اديله راتينج 9/10

الفيلم ده فى ترتيبه 155 فى قايمه احسن 250 فيلم فى التاريخ

..................

كده يبقى والحمدلله خلصنا السلسله

فاضل نقول بس ان القصه الاصليه فى 7 اجزاء

وان احتمال الفيلم يتصور منه جزء كمان فى 2011

بعنوان the bourne legacy

اتمنى ان اى واحد مشافش الفيلم ده يشوفه لانه بجد من احسن افلام الجاسوسيه

ولازم لازم يتشاف

خاصه الجزء التانى والتالت

واسيبكو مع الفيديو الرهيب ده ملخص الحكايه

اسف على الازعاج

صورتى فى لحظه تجلى بعد مواحد ازعجنى

من فضلك

لا تزعجنى بكلامك عن هذا وهذا فانا لا اهتم..فلا تكن كالثرثارات

من فضلك

لا تزعجنى بكلامك عن معاناتك..فانا ايضا اعيش فى الحياه ولست فى عالم الاحلام

من فضلك

لا تحزننى برواياتك المأساويه فانت تحضر الحزن بكلماتك الى ذهنى

من فضلك

لا ترهقنى بطلباتك عشان انا بجد ..طالع عين امى

من فضلك

حاول الاتصال فى وقت لاحق

شيد قصورك

شيد قصورك ع المزارع
من كدنا وعمل إيدينا

الخمارات جنب المصانع
والسجن مطرح الجنينة

واطلق كلابك فى الشوارع
واقفل زنازينك علينا

وقلّ نومنا في المضاجع
أدي احنا
نمنا ما اشتهينا

واتقل علينا بالمواجع
احنا اتوجعنا واكتفينا

وعرفنا
مين سبب جراحنا
وعرفنا روحنا
والتقينا

عمال وفلاحين
وطلبة
دقت ساعتنا
وابتدينا

نسلك طريق
مالهش راجع

والنصر قريب من عنينا

النصر أقرب
من إدينا 

من ابداعات الاسطوره

أحمد فؤاد نجم

غناء احسن شباب مصر بعد القبض عليهم

مظاهره لا للتوريث

الاسكندريه
21-9-2010

احلام

 البرادعى مش شخص

البرادعى فكره

ده حلم الواحد بيحلمه

انا بحلم اكون انسان محترم

دكتور محترم بيعيش زى اقرانه برا

عايز اساعد الناس واعيش وسط ناس مبسوطه وعايشه كويس

لان حتى لو انا كويس واللى حواليا وحش يبقى مش هعيش مبسوط ولا هعيش فى امان

هو انا حرام احلم؟

هو انا حرام اعيش فى بلد حلوه؟؟..حرام اعيش حياه حلوه؟؟

هى الحياه بتتعاش كام مره؟؟

ليه مش عايزنا نحلم؟...ليه مش عايزنا نختار؟

انــــــــــــــا هــــحــــلــــــم

وهحلم

وهحلم

وهحقق احلامى

وهحارب عشانها

وهحاول ولو فشلت احاول تانى وتالت ومليون

ان شاء الله هتتحقق

نعم للبرادعى..نعم للحلم

احداث الرصافه..لا للتوريث..عرابى 2010

ااااااااااااااااه

مش عارف ابدء منين الاول ولا الاخر

نبدء من اول اليوم ..النهارده نزلت عشان احضر احتفال يوم السلام العالمى فى مكتبه اسكندريه واحضر مظاهره لا للتوريث فى الرصافه فى محرم بك الساعه 5 ..شوف المفارقه يا جدع

المهم سيبكو من يوم السلام العالمى ده عايز بوست لوحده وهيبقى فيه فرفشه وضحك واحتفاليه ورقص

خلونا بقى فى الغم

لما الساعه جت اربعه ونص وانا فى الاحتفال قولت يلا امشى اروح ع الرصافه

خدت تاكسي ولسبب ما معظمهم مكانش عايز يروح.. طبعا انا فى سرى اكيد عارف السبب

روحت هناك وقولت للشاب نزلنى عند الميدان هناك لقيت خير اللهم اجعله خير
امن فى كل حته و جحافل من العساكر والعربيات على اول كل شارع بيودى للميدان يعنى مهما لفيت مش هتعرف تدخل

قولتله نزلنى قالى هنا فين استنى ..ايه اللمه دى الظاهر فى حاجه كبيره اوى عشان الانتخابات-برده انا فى سرى عارف السبب-قولتله لا يا باشمهندس دى وقفة ضد التوريث قالى ايه الترويس ده؟

مسكت الضحك فى قراره اعماقى.. اللى هى جوا اوى ديه..

وقلتله: توريث

يعنى مبارك يخلى ابنه يمسك الحكم واحنا نبقى تركه زى البقر والعبيد بيسبهم لابنه

قالى اوبا دى شكلها حاجه كبيره اوى

 !!!!!

المهم نزلت بعد الميدان بحته ورجعت تانى وعينى بتراقب الوضع

مفيش ولا بنى ادم الساعه 5 و5 .. قولت الامن شكله بوظها قبل متبدء زى 6 ابريل اللى فات

اتصلت بمؤمن وقلتله انتو فين يا عم مفيش حد قالى امشى ع الطريق ناحيه محطة مصر وهتلاقينا فى سكتك

مشيت شويه بتاع خمس دقايق ولقيت محمد عبد الكريم بينادى عليا من الترام قمت جريت ونطيت فيه

ايه يا عبدالكريم هنروح فين؟؟ قالى الميدان قولتله الميدان فاضى مفيش حد قالى تعالى بس الناس موجوده 

واحنا راكبين شوفنا هيثم وايناس واتنين كمان من الحمله

روحنا نزلنا من الترام وراينا الوضع كما الجحيم ومفيش اى متظاهر المهم رجعنا تانى ناحيه محطه مصر وفى السكه قابلناهم

شوفت صفوان وسلمت عليه
 (صفوان بحس انه اخويا الكبير)

المهم اتجمعنا فى شارع جانبى واخذنا فى التناقش نلغيها ولا نكمل ونغير المكان بعد المداولات والاتصالات قررو نقل المكان حوالى 200 متر بعد الرصافه عند تقاطع جرين

روحنا هناك ووقفنا كنا بتاع عشرين وجيه يوسف وناس معاه وسميه وبقينا بتاع اربعين وبدءنا نهتف

الامن مكانش لسه عرف مكاننا، خدنا راحتنا وناس منعرفهاش انضمتلنا كمان

سميه خدت شنطتنى عشان تحط فيها حاجتها وقالتلى انت احتمال يتقبض عليك انا لا..بتفهم البنت دى لان الشنطه كانت تقيله ولو كنت شايلها وقت الجرى من الكلاب كان زمانى اتمسكت

وشوفت واحد اسمه محمود شاب اسكندرانى جدع مكنتش بكلمه غير ع النت وبقرء مدونته سلمت عليه 

المهم وقفنا وهتفناوالناس اتفاعلت جدا جدا معانا وجيه الصحفيين بعد معرفو بتغيير المكان .. ثم بدء الهجوم

دخل الظباط اولا مشو الناس اللى بتتفرج ع الرصيف التانى وجيه الامن قولت هيكردنونا بس

حوطونا

ثم بدء العصر

اه و والله اتعصرنا لحد ماتضغطنا فى بتاع 2 متر.. وكانت البنات بتصوت وحسيت انى مش قادر اتنفس تماما

افتكرته بنفس الموقف اللى حصل مع شباب القاهره لما اتفعصو قدام وزاره الداخليه

عصير المتظاهرين

حسيت انى انغمست فى اجساد اللى واقفين حواليا بجد لدرجه انى مبقتش عارف دى راس مين ودى ايد مين معصره بكل ماتحماه الكلمه من معانى

وبعدين سمعت هتافات سيبه...سيبه قولت مسكو حد

لقيت واحد من الشباب بيقول يلا هنتمسك كلنا مع بعض وزقو الكردون فجأه اتفتح
ولقيت الظابط بيزق اللى بيخرج اتزقيت وقولت هاضرب بالعصيان ويطلعونى عربيه الترحيلات
لكن لقيت الطريق مفتوح والمخبرين والعساكر بيضربو بالحزمه والعصيان اللى بيخرج

نائل جرى زى السهم قدامى قمت جيت وراه طاير والامن بيضرب ولقيت حزام بيطير ويلسع فى رقبتى وواحد بيحاول يمسكنى نطيت شمال وجريت باقصى ما عندى 

وانا بحاول اتفادى الامن واحد واحد وانا بجرى وبنط

النضاره طارت منى بس لحقتها

سبحان الله ام المظاهره الوحيده اللى قولت هنزلها بام النضاره ... فى الاكشن ده دايما بلبس لنسز
بس صراحه النهارده جرعه الاكشن كانت زياده شويه..مش شويه بس... هما كتير

والتراب كان مغطينى ونطيت فوق حديده وانا حاسس ان الجيش كله بيطاردنى

احساسى فى الوقت ده احساس ابن وسخه اوى مقدرش اوصفه

دخلت فى شارع جانبى شمال وفى اول زاويه يمين دخلت ولقيت مكان صغير بين عمارتين استخبيت فيه ورا بتاعه كده بتغطى موتور

وخبيت العلم اللى كان فى ايدى..ده جريمه دلوقت

عدلت النضاره اللى اتعوجت وخرجت بعد مانفضت نفسي..

مشيت لاول سوبر ماركت ودخلت جبت كانز وعمال اسمع كلامهم عن المظاهره والامن اللى برا
وكانى معرفش ايتها حاجه يا عم الحج

خرجت مكنتش قادر اتكلم وعينيا حاسس انى مش شايف قدامى

وقفت برا المحل على مالجو يهدى لقيت ابراهيم كامل وبعلو صوته عمال يتكلم قولتله صوتك الناس ابتدت تبصلنا

قالى مخلاص اتضربنا بصيت لقيت اتنين كمان معانا

ابتديت اخرم وامشى فى الشوارع وانا معرفش حاجه...بس حاسس بالامان طول مانابعيد عن الكلاب دول

حاولت اكلم الناس اطمن ناس كتير مبتردش وقلقت .. كلمت بهاء وقولتله يكتب ع النت وكلمت اى حد قريب من النت يكتب اللى حصل

اتصل بيا صفوان اطمن عليا انى سليم وقالى انت فين قولتله معرفش بس فى امان

واتصل بيا سمير واطمن وبعدين اتصل بهاء وقالى انت مكتوب انك اتقبض عليك انت وسمير قولتله لا
انا سليم وسمير برده لسه مكلمنى وسليم

كان ساعتها اتاكدت ان عبدالكريم وهيثم اتمسكو ومش عارف مين تانى..مشيت لحد ملقيت الاستاد قدامى قمت واخد شمال لحد محطه مصر

وهناك كنت هركب واروح قولت اتصل اطمن على سميه كلمتها قالتلى انت فين قولتله محطه مصر قالتلى انا جنبك تعالى وعشان تاخد شنطتك روحت قابلتها وكان معاها سمر وامانى وصفوان

خدت الحاجه واتكلمنا شويه مين اتمسك ومين لا ولقينا بنتين بتبصلنا جامد اتاريهم من اللى شافو المجزره وضرب الشباب وخطفهم اتكلمو شويه مبديين تعاطفهم

روحت وهكذا انتهى هذا اليوم الكئيب ... ربنا ميرجعهم ولا ينولهم حاجه حلوه فى حياتهم الكلاب اللى سحلونا وضربونا

فى اخر اليوم طلعت بتلت حاجات من اللى حصل:

ان لازم الحمله تدى مع دورات اللاعنف تدريبات فى الجرى لمسافات طويله واختراق الضاحيه ونط الحواجز وخرايط كمان بالمره

انى مزعلش انى رفيع ووزنى 60 كيلو بس لان الحاجات دى بتنفع فى الجرى  

احساس جديد وهو احساس القصب لما يتعصر وده حسيت بيه فى المعصره بتاعه الامن المركزى

اسبوعين حلوين

الدراسه بدءت

وانا الحمدلله دراستى هتبدء فى 2-10 لسه اسبوعين

دى بقى احلى و اخر اجازه فى حياتى

لان خامسه وسادسه بدون اجازات :)

عايز اعمل كل حاجه فى الاسبوعين دول

انا مخرجتش فى العيد لانى بكره الزحمه...بحب اسكندريه وهيا فاضيه انا عايز فى الاسبوعين دول ومن غير مصيفين ومن غير طلبه الف كل حته

واعمل كل حاجه

انا العيد كله قضيته مابين التلفزيون وفوتبول مانيجر لعبتى المفضله

اللى ساعات تاخد منى يوم كام

كفايه قعده بقى لزم نتحرك شويه عشان السنه الكبيسه اللى جايه

عايز اروح السينما واروح معرض الكتاب قبل ميخلص

و عن البرادعى سأتحدث

اعتقد مش محتاج اقول مين هو البرادعى

اصلى هقول ايه ولا ايه

هذا الرجل فخر لكل مصرى

تم تكريمه فى العالم كله مش محتاج شهره كمالبعض
لما اخد اجايزه نوبل اتبرع بيها لولاد بلده مش محتاج فلوس كمالبعض

رجع عشان عنده حلم
واللى بيشاركه فى الحلم والرؤيه بيتحرك معاه

سواء اتفقنا او اختلفنا عليه ما زال هذا الرمز فخر لكل مصرى

البرادعى كمان وكمان

انا لسه متكلمتش مش عارف يعنى اتكلم عن تكريمه فى انحاء العالم

ده انا محتاج مدونه لوحدها وخاصه ان فى صور رهيبه محتاجه البومات

طب نتكلم عن رؤيته

برده صعب انى الم كلامه فى جملتين انا هسيبكو مع الفيديو ده

ده فيديو قديم من قبل ميرجع مصر فى فبراير



اللى حكم ع البرادعى من غير ميقرى كويس محتاج يراجع نفسه تانى

البرادعى عنده حلم
مصر تستحق اكتر من اللى هيا فيه

منذ عودته والبرادعى ليه نهج معين
بيختلف مع اسلوب كثير من القوى السياسيه دلوقت

نهج البرادعى ليه نظام اكتر 
ورغم ان المفروض اننا كلنا محاربين ضد الطغيان انما بعض اللى المفروض اننا فى صف واحد ضد الظلم هما اكتر ناس هجوما عليه

اصل فى ناس بتعارض وتناضل من اجل النضال 
ولما بيتسحلو ويرجعو يقولو اتسحلنا وهما فرحانين

وفى ناس زي البرادعى
انا ليا هدف انا مش نازل عشان اتسحل

احنا لما هننزل هننزل مره واحده هتكون الاولى والاخيره
لاننا عارفين انها هتكون نهايه النظام

الحركه مش وقتها دلوقت
واى تحرك دلوقت هيكون مصيره الفشل المريع هيموت الحلم لو عشرات الالاف بس هما اللى اتحركو عشان يحققوه

هدفنا اننا نكون مايسمى بالكتله الحرجه اللى نقدر بيها نضغط ع النظام
وساعتها لو مستجابش الناس دى هتنزل الشارع ولازم متكونش اقل من ربع مليون

عدد يقدر يغير بلد وميتعملش معاه حاجه

ده لينك صفحه البرادعى فى الويكي لمزيد من المعلومات وفى منها كتير كتير 

ودى قناه البرادعى على يوتيوب لو عايز تعرف رؤيته اكتر


وربنا يوفقنا للى فيه الخير لبلدنا عشان تبقى احسن
 

فطار شباب الحمله مع البرادعى

 "انا سعيد انى بجتمع بيكو النهارده رغما عن قانون الطوارئ"

"احنا مش هننزل الشارع غير مره واحده هتكون الاولى والاخيره لاننا هنبقى عارفين انها نهايه النظام"

دول كانو اقوى كلمتين اتقالو امبارح فى فطار د.محمد البرادعى

واللى حضرته امبارح واتبسطت جدا

واللى احلى حاجه انى قابلت شباب كتير فيه

احسن شباب مصر

يارب وفقنا للى فيه الخير

وساعدنا فى تحقيق حلمنا

سؤالين

بصو فى السريع كده سؤالين ونفسي حد يجاوبنى:

1- ايه موقف شيوخ الفضائيات بتوع طاطى راسك للحاكم والمظاهرات حرام من قضيه كاميليا شحاته؟؟

 محمد حسان واللى زيه لما قالو على اضراب 6 ابريل حرام وعلى المظاهرات اعمال عنف بوعظ من الحكومه

ايه موقفهم من اختطاف واحده اسلمت؟؟

هل هيعرفو ان البلد مبقاش فيها قانون وان اللى يصوت فى الحكومه بياخد حقه ولا هيفضلو يطاطو للأبد!!!!!

كلمه واحده افتكرتها:وااااااااااااااااا اسلاماه

 

2-عمليه للمقاومه فى فلسطين امبارح وواحده النهارده قبل انطلاق المفاوضات؟؟

فى عز اسرائيل مهى محتاجه انهى تبين قبل المفاوضات ان الفلسطينين ولاد كلب وهيا اللى كويسه

يقوم فصائل المقاومه اللى نايمه بقالها فتره تعمل عمليتين فى ظرف يومين..علل؟؟!!!

الغريب ان ناس كتير اعرفهم وبيفهمو وهللو للعمليتين

انا كنت على طول باحتار فى موضوع المقاومه ده..

هل العمليات ضد اسرائيل غباء طالما ميزان القوه مش فى صالحنا،لانها بترد بعنف وقتل فى المدنيين العزل الفلسطينيين

ولا لا لازم نفضل نقاوم عشان مننامش ويضيع الحق

بس لحيره دلوقت زادت بالسؤال التانى ده

طبعا مش هسأل على موضوع جمال اللى ابوه خده على رجله فى اخر زياره لامريكا ده..ده هنعرفه بمرور الايام

بس بالله عليكو حد يجاوبلى ع السؤالين اللى فاتو دول.

رسالة الى عبد المنعم رياض

لو يُقتَلونَ مثلما قُتلتْ

لو يعرفونَ أن يموتوا.. مثلما فعلتْ

لو مدمنو الكلامِ في بلادنا

...قد بذلوا نصفَ الذي بذلتْ

لو أنهم من خلفِ طاولاتهمْ

قد خرجوا.. كما خرجتَ أنتْ..

واحترقوا في لهبِ المجدِ، كما احترقتْ

لم يسقطِ المسيحُ مذبوحاً على ترابِ الناصرهْ

ولا استُبيحتْ تغلبٌ

وانكسرَ المناذرهْ…

لو قرأوا – يا سيّدي القائدَ – ما كتبتْ

لكنَّ من عرفتهمْ..

ظلّوا على الحالِ الذي عرفتْ..

يدخّنون، يسكرونَ، يقتلونَ الوقتْ

ويطعمونَ الشعبَ أوراقَ البلاغاتِ كما علِمتْ

وبعضهمْ.. يغوصُ في وحولهِ..

وبعضهمْ..

يغصُّ في بترولهِ..

وبعضهمْ..

قد أغلقَ البابَ على حريمهِ..

ومنتهى نضالهِ..

جاريةٌ في التختْ..

يا أشرفَ القتلى، على أجفاننا أزهرتْ

الخطوةُ الأولى إلى تحريرنا..

أنتَ بها بدأتْ..

يا أيّها الغارقُ في دمائهِ

جميعهم قد كذبوا.. وأنتَ قد صدقتْ

جميعهم قد هُزموا..

ووحدكَ انتصرتْ

نزار قباني
1971