صوره رائعه

صوره صورتها النهارده جامده جدا

اضغط ع الصوره عشان تظهر بالحجم العريض 

الموج بيتزحلق بانسيابيه فوق الصخور اللى عليها ريم شكله جميل

ومنظر الموج وهو بينزل من ع الصخره بلونه الابيض

والالوان خلابه

سبحان الخالق

تخاريف 6 الصبح

اااااااااااااااااااااااه

مش عارف نومى اليومين اللى فاتو بقى متلخبط جدا

بصحى فى اوقات غريبه وانام فى اوقات اغرب

امبارح اتسحرت ونمت الساعه 4 ودلوقت صاحى وبتنطط والساعه 6 يعنى منمتش غير 

ساعتين وكلهم احلام وتقلبات كان دماغى ماكينه

انا نفسي افهم الانسان بينام ازاى؟؟؟!!!

انا درست الجزء ده فى الكليه لكن عمرى مقتنعت بيه

فاكر اللى كان مكتوب عنه فى الفسيولوجى ان الانسان بينام بسبب حدوث

 inhibition of the centres of arousal

مش عارف ترجتمها بالعربى

 بس يقصد مراكز بتهبط من نشاط المراكز اللى بتعمل صحيان

ومتكلم عن المراكز اللى هيا مسئوله عن الصحيان دى لكن مش متكلم ازاى بتتهبط

ودى حاجه غبيه جدا

كانك بتقوول لواحد ازاى الساعات بتتصنع يقولك فى مصانع الساعات
!!!!!!!!!!!

طب انا هعمل ايه دلوقت الساعه 6 ومحدش صاحى ومش لاقى حاجه اعملها

بقفكر انزل واخد الكاميرا واقعد ع البحر

ممكن قبل منزل اتفرجلى على حلقه من حاجه قديمه

بلاش سكرابز لان غالبا هيبقى فى اسقاطات جنسيه والواحد صايم

خلينا فى حاجه طفوليه زى تيمون وبومبا ولا حاجه تاريخيه زى ماوكلى

لما اشوف

اول مره اشوف حاجه محترمه ومبهره بتتكلم عن اختراعات وعلوم المسلمين

وجايبين ممثلين واداء جميل 

حاولو تنشرو الفيديو على قد ماتقدرو

ولو ليكو اصحاب اجانب

ده لينك للفيديو بصوره افضل من غير ترجمه

التظاهر

التظاهر او التصنع او  

pretending

مصدر الصوره

ليه كتير من الناس حوالى بيتظاهرو..ليه انا كمان بتظاهر؟؟

ليه احنا بنتظاهر واحنا مش حاسين اننا بنتظاهر؟!!

مشهد لليوناردو دى كابريو فى فيلم the departed لما كان بيكلم فيرا فارميجا وكانت هيا طبيبه نفسيه بتشتغل فى جهاز الشرطه وبتعالج المشاكل النفسيه للظباط او الطلبه المطرودين من اكاديميه الشرطه

سألها هل الظباط دول بييجو يبكوا وينزلو دموعهم قدامك ؟؟

ردت:اه..ساعات،لما يبقى عندهم مشكله،يضطرو يضربو حد او يستخدمو اسلحتهم

قالها لا.. دول بييجو يعيطو عشان بيتفرجو ع التلفزيون لدرجه كافيه انه يعرف انه لما يستخدم سلاحه ويموت انسان لازم ييجى يجرى ويعيط بعدها

نفس الموقف بشوفه كل يوم

والاسوء انى ساعات بعملها...مواقف كتير زى:

لعيب الكوره اللى لما يضيع كوره ولا بلن يقعد يشد فى شعره او يترمى فى الارض

اصله شاف التلفزيون بدرجه كافيه انه عارف انه لما يضيع الكوره لازم شد شعره ويرفع حواجبه ويعمل متأثر

صاحبى فى البلاى ستايشن لما يضيع كوره ويقعد يمسك فى راسه 

لما بنلعب كوره والاقى واحد سجد لما جاب الجون !!!

الواحد لما يحب ويفضل يتلوى فى السرير زى الكلب الجربان

مهو ده عشان سمع عبدالحليم ومحمد فؤاد لدرجه انه عارف انه لما يحس بشعور حلو ويحب يبقى لازم ميعرفش ينام ويتقلب ويحس بنار الحب

على كده بقى الناس بعد مبتخطب او تجوز وتعرف تنام يبقى بطلت حب!!!!

انا زهقت من التظاهر اللى بشوفه حواليا واللى انا ساعات بعمله

لا للتظاهر لا للتصنع

خليك على طبيعتك متقلدش حد

ده هيبقى شعارى من دلوقت

لسه فيكى خير يا بلدى

انا حكيت على الجولات دى كتير قبل كده مش عايز اصدعكو تانى

وكل الجولات اللى فاتت موجوده فى المدونه

كل مره زى اللى قبلها بس المره دى هضيف الجديد على طول

الجوله اول امبارح كانت فى بحرى

وهى منطقه الى حد ما فقيره ونسبه التعليم فيها اقل بالنسبه الى المناطق الاخرى فى اسكندريه

طبعا الاقبال كان ضعيف وده رجعنى تانى لنقطه ان الناس بتعانى بس برده بتخاف تشتكى وان الجهل هو عدونا الاول قبل الحزب الوطنى  والتزوير والفساد

الموقف اللى استوقفنى كثيرا (حلوه استوقفنى دى)

لما غلب حمارى مع الناس

وقفنا مشلولين وعاجزين عن الفهم وسط كل الناس الميته دى (على رأى الرائع احمد خالد توفيق) مئات بل والوف بل ملايين السيدات حباره--راجع مقال السيد حباره

نرجع تانى للموقف

وقفنا مشلولين فبصيت ع البحر لقيت واحد قاعد جنب ابوه واخته وامه وفاتح اللاب توب وبيكتب ومركز

قولت لحازم صاحبى وزميلى الانتيخ

يلا يا حازم الراجل ده شكله متعلم وهيتجاوب معانا

لسه بقوله السلام عليكم ممكن اعطل حضرتك خمس دقايق

 لقيته رد عليا وبجفاء شديد: لا امشى من هنا

انا استغربت جدا،هو برده بصلى وقالى هو انتو مش من الحزب الوطنى..قولتله لا واديته البيان قولتله بقى الحزب الوطنى هيلم توقيعات زى دى وكمان لابسلك تى شيرت البرادعي (ساحره ولا مش ساحره :D)

امه واخته بصولى وضحكو 

فقالى بحسبك من حمله جمال مبارك،سيبلى الورق وانا هقراه سيبتله اربع ورقات

ورحت اكلم شباب تانيين معديين بعد عشر دقايق لقيت حازم بيدينى اربع ورقات بيقولى خد الراجل وعيلته وقعوا

متتخيلوش كميه الفرح اللى حسيت بيها

وقولت رغم انى ساعات بقول الناس دي متستاهلش بس مواقف زى ديه بتدى الواحد دفعة للامام

لسه فيكى خير يا بلدى 

صور الجوله على الفيس بوك

كفايه ..2005 -2011

                                    الحركه المصريه من اجل التغيير (كفايه)

اشهر حركه احتجاجيه فى الخمس سنين اللى فاتو

وام كل الحركات اللى قامت بعدها

بدايه... انا للاسف مشتركتش فى اى فعاليه من فعاليات كفايه فى عزها 2004 و 2005

ايامها كنت صغير مبفهمش،وكمان كان عندى امتحانات الثانويه العامه والنت مكتش انتشر زى دلوقت

بس رغم كده كنت متابع اخبارها كويس

وفرحت جدا لما حسيت ان الناس عايزه تغير الوضع وابتدت تثور

وكنت ببص لكل اعضاء الحركه على انهم مناضلين نفسي اشوف حد فيهم عشان اسلم عليه

كان ايامها لسه برده الصحافه المستقله بادئه

واكتر صحيفه ارتبطت فى ذهنى بالفتره دى جريده الفجر

اخبار الحركه كانت ماليه الجرايد و الصور كانت تحرك المشاعر وانا لسه فاكر صور مظاهره ضريح سعد زغلول والشموع

المظاهره اللى حسيت انها ممكن تعمل ثوره 

بس للاسف انهارت الحركه واختفت بعدها

يمكن عشان عقدنا عليها الكثير من الامال واستنينا كالعاده حد يغيرلنا واحنا قاعدين فى البيت

المهم 

انا من كام شهر كنت عبيط

على رأى هشام الجخ

لكن مع عوده البرادعى والاستقبال الكبير اللى شهده المطار والجروب الى كنت فيه بالاسم بس لحد مشوفت الحكايه بتكبر كل يوم

اتطوعت وبقيت من نشطاء الحمله 

مع الوقت اتعرفت على ناس من ابطالى بتوع 2005 وقعدو يحكولى عن ذكرياتهم

احترمتهم جدا .. 

افتكرت ذكريات كفايه دى دلوقت

وافتكرت ان دلوقت جت الفرصه انى ابقى من الناس اللى احترمتهم دول

انا ماليش اى طموح سياسى انا بس عايز بلد احسن اعيش فيها مواطن محترم،عشان كده انا بشارك فى كل حاجه دلوقت لكن لحد 2011 بس ..وهو تقريبا كله لحد 2011 بس 

فى دلوقت حاجه بتحصل ولازم كلنا نشارك 

بس يا ترى هل هنقدر نحقق كل الامال ولا هننهار زى كفايه 2005

ساعات بقول نقدر وساعات بشوف حالنا واقول لا.

انما يبقى السؤال؟؟؟ والف مليون احتمال!!!

fantasy premier league

هييييييييييييييه لعبتى المفضله على النت هتبدء بكره

بكره هيبدء الدورى الانجليزى وهتبدء معاه لعبه الفانتزى

انا مدمن اللعبه ديه

مميزاتها كتير لعبه بسيطه ومش معقده بس محتاجه مغامره وثقافه ومعلومات عن اللعيبه

دى تالت سنه العبها السنه اللى فاتت ساهمت فى انتشار اللعبه بين اصحابى اكتر واكتر

ودى خلت فى منافسه حلوه ومضحكه

طبعا بدون ذكر انى حطيت عليهم

وبدون ذكر اسماء

عمرو زكى وحازم كرم وابراهيم عبد الله

وكريم ومحمد مرسي:D

واللعبه ميزتها انها بتقلل جدا من التعصب لانك بتختار لعيبه من فرق منافسه وبتتمنى فوزها

وصراحه اللى اخترعها عبقرى فى النقطه دى

مثلا انا بحب تشلسى وطبيعيا لازم اكره اليونايتد

بس عشان خاطر الفريق ...الواحد بيتمنى فوز اليونايتد

السنه اللى فاتت فوز تشلسى بالدورى ووجود لعيبه تشلسى فى فريقى هو اللى ساعدنى فى الفوز

ياترى السنه دى مين هيفوز

لما نشوف

انضمو لينا

اعمل فريق وادخل دورى الاوغاد

classic league

320294-182506

head to head

320294-182516

اعمل فريق وهتلاقى ع الشمال كلمه leagues

تختار join

واكتب الاكواد اللى حاططها

هما دوريين

واحد كلاسيك يعنى صاحب المجموع الاعلى هيفوز فى اخر الدورى

والهيد تو هيد

وده ماتش قدام لاعب مختلف كل اسبوع

والفائز صاحب اعلى معدل نقط زى الدورى

وده موقع مفيد جدا لمحبى اللعبه دى 

مسيره السيارات واعتداءات الامن

 
انا في المستشفي دلوقت امن الدوله ضربنا
 about 11 hours ago via mobile web

مؤمن مغمي عليه دلوقت و نائل ومحمود ممسوكين

about 11 hours ago via mobile web

 خدو 8 عربيات مننا
about 11 hours ago via mobile web

حد ينقل اللي بكتبه ده ع الفيس
about 11 hours ago via mobile web

سرقو المحافظ و الشنط اللي في العربيات
about 11 hours ago via mobile web

هنوجه المحضر ضد هشام الخطيب
about 11 hours ago via mobile web

انا واقف مع المهندس سيد بسيوني معانا من الاول
about 11 hours ago via mobile web

الاوضاع شبه مستقره الحمدلله
about 10 hours ago via mobile web

اخر اخبار اللي اتمسكوا انهم في الحضانه مع العربيات
about 10 hours ago via mobile web

اخر تويتايه قبل مالشحن يخلص الناس خرجت و 5 عربيات اتحجزت
about 10 hours ago via mobile web  

ده كان اللى كتبته على تويتر من مستشفى القوات المسلحه وانا فى عز المعمعه

فلاش باك للى حصل النهارده من الاول:

 كان المفروض النهارده نعمل جوله بالسيارات زى اللى اتعملت فى القاهره من كام يوم

الفكره دى كانت فى بالنا من فتره بس مكناش لسه اتقفنا عليها

المهم تم الاتفاق اننا نعملها الاتنين وهنبدء من عند كارفور الساعه5

لما روحت عند كارفور ملقيتش حد بس لاحظت ان فى كذا بوكس واقفين

 بصيت لقيت مدير امن اسكندريه ومعاه كام ظابط فى زى الشرطه

كلمت الناس وعرفت انهم واقفين عند الناحيه التانيه وواقفين بعيد عن بعض ومش مطلعين اعلام او بوسترات عشان منلفتش نظر الامن

كلمت نائل وركبت معاه واستنينا لما الناس اتلمت وطلعت المسيره

كنا مطلعين الاعلام والبوسترات من الشبابيك وواخدين شمال وبنكلم الناس اللى تعدى جنبنا

وقولنا خلاص بقى فلتنا من الامن 

اتحركنا لناحيه البحر عن طريق محرم بك لحد موصلنا لحد مبنى اداره الجامعه 

وخلال الطريق النجاح اللى عملناه هو اللى خلانا نكمل اكتر لاننا كنا المفروض نقف قبل البحر لكن قولنا نكمل

كنا بنوزع اعلام وبوسترات ونلاقى الناس بتتفاعل وتسالنا فيه ايه ونقولهم البرادعى يقولو يارب

وناس تسالنا هو مين اللى هيلعب النهارده :D 

واحنا طالعين ع الكورنيش عند مبنى اداره الجامعه جيه ظابط ومعاه اتنين عساكر وقطعو علينا الطريق بالونش
نزل الظابط وقال محدش يتحرك

خد الرخص ووقف يتكلم ويهزر مع الناس وهو اساسا كان الغرض انه يعطلنا لحد ماالأمن اللى زوغنا منه عند كارفور ييجى
ابتدى الظباط والمخبرين يوصلو وموتوسيكلات

وفى ناس بتقول ان مدير الامن جيه فى مبنى اداره الجامعه جنبنا

المهم اننا نزلنا من العربيات وقولنا هناخد الرخص دلوقت ونخلع
لكن لقينا الموضوع بيكبر ... بما انها كده كده باظت كله نزل بالاعلام والبوسترات وابتدينا نكلم الناس اللى ماشيين ع الكورنيش والناس تزمر وهى ماشيه ع الكورنيش  وناس خدت بوسترات ووقفت معانا

الظباط مرضوش يرجعو الرخص وابتدينا نهتف حريه حريه وبعد مكنا فى حالنا هما بغباءهم خلوها مظاهره
وابتدى امن اكتر يوصل ومعظمهم امن دوله وكميه كبيره جدا من المخبرين

فجأه لقينا ابراهيم بيتشد على جوه طلعنا كلنا نجرى وراه عشان لو لوحده هياخدوه لو كلنا معاه مش هيقدرو يعملو حاجه
ابتدت الاحتكاكات مع الامن هنا قامو عملو علينا كردون كنا حوالى عشره جوا والمخبرين حوالينا عمالين يزوقونا كل منحاول نخرج
والناس خارج من البلكونات والشبابيك تشوف فى ايه وايمان عماله تزعق فيهم متخافوش
 والمهندس سيد بسيونى قعد يتكلم مع الظباط عشان نخرج بعدين جاب هيثم يمكن يوصلو لحل

فى الشارع ده خدو الكاميرا من مؤمن
والكاميرا كان عليها كل حاجه لان مؤمن كان فى اول عربيه وبيصور المسيره من الاول

الظابط فتحلنا وقالنا بس تخرجو من الناحيه دى (عكس الطريق اللى كنا جايين منه)
قولنا لا مش هنمشي غير لما ناخد الرخص رجعنا تانى ع البحر لقينا الونش بيشيل عربيه هيثم
وكان فيها شنط ومحافظ ناس فجأه لقيت حد بيصوت وبصيت لقيت مؤمن مرمى على شنطه عربيه

روحت لقيته مش عارف يصلب طوله
حاولنا نشيله جسمه متخشب نيمناه ع الارض وواحد جاب ميه وحاولنا نفوقه مش عارفين

كمه كان فيه دم وبنطلونه مقطوع وسالت فى ايه؟؟ كذا واحد شاف الظابط هشام الخطيب(عقيد امن دوله) بنفسه وهو بيضربه فى وشه


شيلناه وقولنا نروح بيه المستشفى الظابط مكانش راضى
قولناله هنروح بيه يعنى هنروح بيه
اتصلت بالاسعاف عشان لو الظابط مرضاش يخلينا نوديه المستشفى نلحقه  وقبل مكلمهم لقيناه تاكسي وقف نقلته انا وجون وايمان وطلعنا على مستشفى القوات المسلحه

فى الطريق كان واعى وبيحرك ايديه بس مش قادر يفتح عينيه ولا يتكلم

انا وايمان ومؤمن كنا كلنا لابسين تى شيرتات البرادعى واحنا داخلين وكلهم بيبصولنا قلعت التى شيرت ودخلنا ع الطوارئ هناك الدكتور كشف عليه وقال هى حاجه نفسيه مش بدنيه كان مؤمن ساعتها بياخد نفس بسرعه رهيبه

اداله مهدئ وقال سيبوه شويه وهيبقى كويس
دخلت انا وايمان لقيناه فى وعيه والحمدلله هدى وبقى احسن بس مش بيفتح عينيه

قولنالهم فى الاستقبال ان واحد ضربه فى خناقه مش على اللى حصل

كلمنا الناس  وكذا واحد كلمونى من القاهره ومن طنطا ومن كل حته وانا اقولهم انشرو الخبر اهم حاجه وكلمت نبيل وقولتله يكلم الجرايد وكلمت نائل وعرفت ان هو ومحمود فى المرور واحتمال يروحو المديريه
وساعتها كتبت على تويتر وقلنا للناس تنشر ع النت اللى بيحصل

وصل ناصر ودخل يشوف التقرير الطبى عشان نعمل المحضر وسالت المهندس سيد بسيونى ع الناس اللى اتمسكت قالى ان الموضوع هيخلص فى المرور بتهمه الازعاج وتعطيل المرور و ملصقات

لكن هما هيخافو يكبر الموضوع ويدخلوه فى البرادعى والتغيير وكده الحمدلله اطمنت

صورت مؤمن الصورتين الموجودين واللى كل الناس شافتهم دول
وروحت مع اسماعيل رفعناهم ع النت و رجعت عند المستشفى تانى لقيت مؤمن الحمدلله ع الباب وقام وكويس الحمدلله

والحمدلله اتصلت ولقيت الناس كلها روحت بس ولاد التيت خدو خمس عربيات

الحمدلله ان محدش جراله حاجه وده نهايه فاصل جديد من الديمقراطيه اللى الحزب الواطى بيتفاخر بيها

الصور اللى صورتها النهارده اهيه والباقى ع الفيسبوك

ودول النهارده فى المسيره

الاخبار فى كذا موقع

الدستور .. مصراوى .. الشروق

وده بيان الحمله 

SALT

اول امبارح شوفت فيلم سولت لانجيلينا

هو فيلم عادى ياخد راتينج 7/10 

مش هحرق احداث الفيلم عشان اللى عايز يشوفه

الفيلم مفيهوش تمثيل قد كده

وحتى الاحداث متوقعه...القصه حلوه لانها فتحت ملف الجواسيس المزروعين من ايام الحرب البارده

 بس هو حلو فى نهايته لان النهايه غير متوقعه وهتعجب اى حد يشوف الفيلم

لو انت من النوع اللى خروجك قليل ومش بتروح السينما ع طول يبقى مالوش لازمه تدخله واختار حاجه تانيه

لو انت بتروح السينما على طول يبقى شوفه هيعجبك

بس انا من ساعه مشوفت الفيلم وانا بقول لنفسى

انجيلينا جولى اوحشت كده ليه يا جدعان !!!