الوقفه اللى بقت مسيره واتقلبت مظاهره(2)

بسم الله
نكمل بقى اللى حصل يوم الجمعه

زى مقولنا كنا ماشيين مسيره صف واحد من المكتبه متوجهين لسيدى جابر
لحد ساعتها طبعا مكناش نعرف عن سيدى جابر اى معلومات غير ان الامن ضربهم وفرقهم من هنالك

واحنا ماشيين كنا بنلم الشباب
فجأه واحنا ماشيين ع البحر وقدام فندق نوبل بالظبط

لقينا المسيره توقفت
طلعت قدام اشوف فى ايه

لقيت ناس كتير كلهم بزى ملكى موقفين الشباب
قولنا للشباب محدش يمشى وخليكو صف واحد

قعدنا نتكلم مع الامن شويه وسيبونا نكمل لا امشوا وهكذا
لحد مظهر مدير امن اسكندريه لابس بدله بيضا ملكى مش بوليس ومعاه ظباط امن دوله تقريبا

وزى ميكون ادى اشاره خفيه لقيته فجأه رجع ورا والمخبرين بيزقو وبيشتموهم الشباب جامد
وابتدى بعض الشباب يجرى....اغلبهم اول مره ومتوقعوش العمليه تبقى كده

بصيت لقيت يوسف فى اول صف من اللى بيزقو انا كنت وراه بكام متر قمت جيت طالع على قدام ازق فى المخبرين
وانا قدام لقيت فى ثوانى حوالى 8 عربيات امن مركزى ظهرو من العدم
ونط منهم العساكر واتفردو فى شكل كردون من كل الاتجاهات

انا مصوره بالظبط فى الفيديو ده

قعدنا نهتف بص شوف الاهاب اهو والعساكر بتحاصرنا من الاتجاهات الاربعه
اموت واعرف حطو صف من ورانا ليه هننط فى البحر مثلا

بعض الشباب خاف وجرى ومعظمهم عدى الكورنيش ووقف ع الناحيه التانيه يتابع ايه الوضع

كنت لسه واقف قدام وجنبى مدير الامن ولقيت شباب بيكلموه وناس منهم هبله وبتزعقله

طبعا هما معاهم حق يزعقو لاننا معملناش حاجه غلط بس لو انت عايز تزعق اقف ورا
وسيب اللى قدام يتكلمو بهدوء عشان توصل لحل

لقيت الراجل قدامى وبيتكلم باحترام قولتله يافندم احنا معملناش حاجه غلط مفيش ولا تجمع ولا هتافات ولا اى مخالفه للقانون
قالى لا انتو نزلتو الطريق وعطلتو المرور وخالفتو القانون شويه وكان هيطلع حته حشيش من جيبى
قمت جيت قولت دول مش هتفرق معاهم ولو عايبز يطلعك ارهابى هيطلعك

رجعت لورا اشوف صحابى مين فيهم برا الكردون ومين الواطيين اللى خلعو :D

لقيت معظمهم الحمدلله جوا الكردون وعرفت انى معايا رجاله

كان فى بنت يا عينى شوفتها ع البحر وهى متعرفش فى ايه فبتسال مين الناس اللى لابسه اسود دى وفى ايه
حكتلها لقصه ومشيت معانا فجأه لقيتها جوه الكردون معانا
وشكلها مرعوب ..وبتقولى هو فى ايه هيعملو فينا ايه؟!

وكان فى برده طفل قابلته البحر شكله مرعوب من منظر الحصار

لما احكيلكو قصته ع السريع عشان بجد الواد ده ادانى امل فى ان البلد دى يبقى ليها مستقبل

اسمه زياد
عنده 12 سنه

لقيته ماشى جنبى وبيسالنى عمو هو احنا عدينا الابراهيميه
قولتله لا والله يا حبيبى،بتسأل ليه؟

قالى عشان اعرف عديت بيتى ولا لا.

سالته هو انت لقيتنا ماشيين ،مشيت معانا بالصدفه
قالى لا انا جيت من النادى على الكورنيش عشان خالد سعيد

انا استغربت اوى ده طفل عنده 12 سنه وسالته انت عرفت موضوع خالد ده منين
قالى من ع الفيس

قولتله والله كويس واتكلمت معاه شويه.. قالى انه قال لمامته انه نازل الوقفه الصامته قالتله لا ،فقالها هيروح النادى وبعد مخلص طلع معانا الوقفه!!

الواد ده بجد حسسنى بامل فظيع بعد ماكنت مفتقده

المهم قعدت اطمن زياد والبنت دى ولقيت بنت بتعيط وناس بتطبطب عليها
وشباب شكله خايف كلمتهم لقتهم برده اول مره ومكانوش متوقعين كده

كله ده واحنا تحت الحصار واحد من الشباب قال اقعدو فى الارض
احنا فاضيينلهم بقى وخليهم يحاصرونا

قعدنا ومنظر الكورنيش والعربيات اللى معديه بتصور وكل العمارات اللى ع البحر الناس طلعت من البلكونات تصور
كان منظر جميل جدا

واحد من الشباب قالى يلا نصلى المغرب
احلى حاجه بجد ان الوقفه تبقى غير خاضعه لتوجه معين وانها تبقى مفتوحه لكل الافكار

المهم واحد اقام الصلاه
والبنات رجعت ورا وانا وقفت فى الصف الاول رغم انى كان نفسي اصور المنظر ده بس قولت اقف اصلى احسن

صلينا المغرب فى مشهد عظيم تحت رجلين عساكر الامن المركزى
والعساكر يا عينى كان شكلهم متضايق اوى وهما اساس غلابه واحنا عارفين

بعد الصلاه اول مخلصنا قعدنا نقول انصرنا يارب ..انصرنا يارب
ولقيت شاب بيعيط

وبدءت تتعالى الهتافات ضد النظام ومبارك،ناس قالت لا بلاش نهتف ..وطبعا زى مبقولكو المعظم اول مره فخاف لما لقى حصار ويسقط يسقط حسنى مبارك وانا اساسا مش مع الهتاف فى حاله زى دى وكان فى بنت بتعيط

المهم المسيره بقت مظاهره شويه هتافات على تصقيف على دبدبه ع الارض
وبدءت المفاوضات

جالنا لواء بزى رسمي
طلعت اشوف هيقول ايه

هو اسمه على ..بس مش فاكر على ايه
وشكله بيدى على راجل طيب بس الموقف اللى عمله مش طيب خالص

قالنا عايزين ايه كلمناه ع الوقفه الصامته وضهرنا وبعيد عن بعض ومن غير هتاف قال لو كده احنا موافقين
قولتله طب ما ده اللى احنا عايزينه من الاول قال ماشى
انا همشيلكو العساكر وانتو اعملو الصف بتاعكو ده من غير مخالفات

ولقينا شال العساكر من الجنب اليمين لينا وانت ضهرك للبحر ووشك للفندق والشمال لو انت وشك للبحر وضهرك للفندق
هقولكو اشمعنا الاتجاه ده

لما فتح الفتح ده بدء الشباب يتحرك فى الاتجاه اللى بقولكو عليه ده واللى عارف المنطقه كويس عارف انك لو مشيت 10 متر من مكاننا قدام الفندق هتلاقى جراج كبير

وده اللى حصل ولاد التيت ضحكو علينا وبدل مالوقفه كانت متحاصره ع البحر وكل العربيات والناس شايفانا وبتصور
لقينا نفسنا فى الجراج واتعمل علينا كردون تانى اكبر من الاول بكتير ومحدش شايفنا

بس بجد العالم دى عالم بتفكر وده بيعرفنى فعلا انا احنا وقعنا فى غلطه رهيبه وهى اننا كنا لازم ناخد بالنا من طبيعه المكان اول موقفونا ونعرف هما بيعملو ايه

وقفنا زى المره اللى فاتت بس كانت الناس اكتر.. المره دى لمو الناس كلها

مفاوضات ومفاوضات

بعدين وصلنا لحل انهم يخرجونا
فاللواء اللى قولتلكو عليه ده ظهر تانى وقال هخرج البنات بس الاول

انا بقى من ساعه الجراج عرفت انهم هيعملو حاجه غدر برده زى الجراج
طلعت كان ا-فتحى واقف معاه

قمت جيت قايل ل ا-فتحى واللواء واقف مينفعش كده يا ا-فتحى
كده هيخرجو البنات ويتلككولنا احنا لو شاب على صوته ويفرمونا.. لازم كله يخرج مع بعضه بنات وصبيان

وفعلا فى بنات من ورا لقيتهم بيقولو مش هنطلع غير مع بعض كلنا
والبنات عرفو انهم لو هما بس اللى طلعو احنا ممكن نتبهدل

قام جاى اللواء ده قال تعالى ،قولتله نعم.
قاللى انت خايف انا عارف
قولتله لا مش خايف، انا عايز اعرف اشمعنا هتطلعو البنات بس؟؟

قالى خلاص يا سيدى هنخرج كله ،خليهم تلاته صبيان وتلاته بنات
هما كانو بيخرجو مجموعات كل مجموعه تلاته

المهم خرجت انا وعليوه وزياد اللى حكتلكو عليه
ووقفنا من بعيد نستنى بقيه اصحابنا زياد كان شكله مرعوب طمنته وقولتله روح

المهم بهاء وبهاء وامين واسامه جم وكلمت حازم وحازم ويوسف
واتلمينا تانى ع البحر واتمشينا شويه

وكل مشوف حد من الشباب اللى كانو معانا اكلمه ع التغيير وكده واللى حصل النهارده

وروحت انا وعليوه وحازم وانا مبسوط جدا
كان يوم كفاحى حلو

وده كان اول يوم اجازه
ونلقاكم فى عمليات قادمه

الصور كلها فى البوم على بروفايلى والفيديوهات فى الاكونت بتاعى ع اليوتيوب او ع الفيس بوك
وانا حطيت اهم اللينكات كهيبر لنكات عشان تعيشو القصه وتشوف الشخصيات

والسلام ختام

الوقفه اللى بقت مسيره واتقلبت مظاهره(1)

امبارح كان الجمعه 9-7
ميعاد الوقفه الصامته التالته لخالد سعيد

اليوم ده حصل فيه كل حاجه ورغم انى روحت تعبان جدا جدا الا انى كنت مبسوط جدا جدا جدا

مش عارف ابدء منين ولا احكى ايه بس هبدء من اول اليوم احسن

اتفقت مع 6 جيرانى اننا ننزل مع بعض طبعا اللى قال انه تعبان واللى كسلان واللى معرفش ايه المهم بقينا تلاته
انا وحازم ويوسف وكلنا طبعا ضاربين الطقم الاسود

ركبنا وفى الطريق كنا بنكلم صحابنا نشوف مين نازل
انا كلمت بهاء وهو كلم ناس صحابنا برده وكانو بتاع اربعه واتفقنا مع اتنين كمان هيجولنا عند المكتبه

كنا لسه مش عارفين نروح عند المكتبه ولا ستانلى المهم الحمدلله
قولنا ننزل عند المكتبه-المكان الوحيد اللى اتعمل فيه وقفه فى اسكندريه اليوم ده- المهم نزلنا عند الازاريطه وقولنا ندخل من ورا
واحنا ماشيين لقينا 3 عربيات امن مركزى واقفين على اول الشارع

قمنا جايين لفين تانى من ورا اكتر وانا ماشى لقيت اتنين معايا من حمله دعم البرادعى
ولقيتهم مستنيين واحد تالت

كنا ماشيين معاهم لحد مسبحان الله روحنا نجيب صاحبنا وهما سبقونا اتاريهم كان نازلهم اتنين مخبرين مخصوص عشان ميروحوش عند المكتبه
كويس اننا ممشيناش معاهم

كملت انا ويوسف وحازم وقابلنا صاحبنا ده ولقينا كام واحد كمان واقفين شكلهم نازلين عشان الوقفه ولقينا واحد صاحبنا كمان وواحد زميلنا من الكليه كانو مشوه من ستانلى وقولتله تعالالنا

اتصل بقى بيا بهاء وقالى بيمشو الناس من ستانلى ومفيش ولا واحد واقف قولتله تعالى واحنا هنقف برده عند المكتبه

بدءنا بقى نلاقى مخبرين حوالين وظباط فى زى ملكى
وكلهم امشو من هنا.. امشو من هنا

يوسف مشى مع شويه من صحابنا من ناحيه وانا وحازم وحازم وعليوه من ناحيه
المهم الكورنيش كله مخبرين
وشكلهم واضح جدا صباح الهبل والطبنجات باينه من تحت الهدوم عالم بتجيد التنكر يعنى :D
على رأى حازم فاضلهم الجرنان المخروم

قعدوا يمشونا وحسيت ان الكورنيش كله محتل وممنوع الوقفه

المهم واحنا ماشيين لقيت ا-فتحى وده المنسق السابق للجمعيه الوطنيه بتاعه الجبهه فى اسكندريه
وكان معاه واحد كمان
قولتله الامن بيمشى الناس ومفيش ولا واحد واقف

قالى لا تعالو متخافوش وحقكو فى الوقفه والتعبير وكده ،،قولتله تعالى ومشيت انا وهو والراجل اللى معاه وحازم وحازم وعليوه
وقفنا ع الكورنيش زى متفقنا لقينا بنتين كمان وقفو وشباب لابس اسود شافونا وقفو كمان معانا وابتديت الناس تتلم لما شافتنا

جيه مخبر حاول يمشى ا-فتحى لما حس ان الراجل ده اللى وقفنا،قام ا-فتحى شخط فيه وقاله انا مباخدش اوامر من حد
انا من حقى اقف هاتلى الظابط بتاعك

فجأه لقيت حوالينا ظباط امن دوله ومخبرين وهيصه
كنا ساعتها قدام مستشفى الاطفال فى الشاطبى

طبعا الظباط قعدو يكلموه ويكلمونا باحترام جدا
جيه ظابط امن دوله قعد يقولى اسمك ايه وبتدرس فين
واما قولتله..
قالى يعنى دكتور محترم اهو امال ايه اللى جايبك، قولتله احنا مبنعملش مشاكل وواقفين من غير لاتجمع ولاهتافات وكده
قالى روح انت زى ابنى ودى اوامر وتعليمات، فضلت واقف وهكذا كل ميكلمو حازم او بقيه صحابى بنظام انتو اخواتنا وده شغلنا حاولو مع كل الشباب ومحدش بيمشى

والعدد بقى عمال يزيد وتاكسيات تقف وناس لابسه اسود تنزل

بقينا حوالى بتاع 200 واحد لابسين اسود قدام مستشفى الاطفال
والعدد بيزيد وعرفت من صحابى فى 6 ابريل ان الوقفه تم تفريقها عند سيدى جابر وعند سان سيفانو وفى ستانلى

وقفنا لحد مالساعه جت سبعه ونص
يعنى ميعاد انتهاء الوقفه ..كان ساعتها كل الظباط بيتصلو ببعض ويقولو تعالو العيال عرفو يعملو الوقفه تعالولنا عند المكتبه

المهم جم شباب قالو احنا لازم نمشي لحد سيدى جابر عشان نشوف الناس اللى اتضربت
واللى تفرقو منهم ييجو معانا

عملنا صف ولسه هنبدء نمشي لقيت دوشه قدام وشوفت عربيه ترحيلات وقفت وعساكر بتنط منها
قولت اوووبس شكلهم هياخدو مننا كام واحد عشان يبقو عبره لمن يعتبر :D

بس الحمدلله سابونا نمشي... مشينا صف واحد من المكتبه متوجهين الى سيدى جابر مكناش نعرف المفاجأه اللى بيحضروهلنا فى الطريق

كنا بقى فى الطريق عمالين نلم الشباب اللى فرقوهم فى سيدى جابر وانا وا-فتحى كلمنا ماهينور اللى هما اتحاصرو وفرقوهم من سيدى جابر وعرفنا ايه اللى حصل عشان نلم الناس اللى مشوهم ونرجع بيهم على سيدى جابر

استنو الباقى بقى عشان انا تعبت دلوقت

اللى مطلع عين ابونا ..قاهر احلام الثانويه العامه..ابن زكى بدر

بصو يا رجاله
بعد الصلاه ع النبى كده


انا مش هتكلم عن الوزير بشكل عام
ولا ان ابوه كان وزير داخليه ولا انه مالوش فى التعليم ولا عن الشو اللى بيعمله فى المدارس ولا تصرفاته لما كان ماسك جامعه القاهره

انا هتكلم على حاجه واحده
امتحانات الثانويه العامه

مش معنى انى معارض انى ابقى اعارض واهو اشتم فى اى حاجه تعملها الحكومه ولا وزير مستبد

اولا كميه التصريحات والشكاوى والشتايم وكل اللى شوفتوه ده
ايه اللى الناس فيه ده؟!!

يعنى ايه امتحانات صعبه
هو الوزير هو اللى بيختار الاسئله؟؟!!

ولو كان الوزير زى مبيقولو انه اداهم امر ان الامتحانات تبقى صعبه
وانه اللى معرفش هيجيب 85% الوزير هيروح يبوس ايده


فأهم حاجه ان الامتحانات على كله

لو الامتحانات صعبه زى مبتقولو يبقى كل المجاميع هتنزل ولو سهله يبقى كل المجاميع هتعلى

يعنى بدل مكان بييجى امتحانات سهله وهبله وتلاقى كله جايب فوق ال97 مهو المجموع بتاع التنسيق والقبول بيزيد
والطب مثلا تاخد من 98 واعلى

انما لو امتحان صعب والكويس جايب مجموع حوالى 90 ساعتها الطب هتاخد من90


انا اللى مزعلنى ومخلينى اكتب فى الموضوع ده
هو كم الجهد المهول والفظيع اللى رايح ع الفاضى

الناس اللى عماله تتصل ببرامج التوك شو وتشتكى.. والطلبه اللى بتتكلم بعد الامتحانات
صفحات الجرائد اللى اتملت اخبار وصور لطلبه بيعيطو
وصلت ان الاهالى عملو وقفات احتجاجيه ومظاهرات

طب سؤال:
هل لما تعملو مظاهرات وتتصلو وتعملو شكاوى
هل الوزير هيتصل باللى حاطط الامتحان يقوله هاتلنا امتحان ساهل
الامتحانات اساسا بتبقى اتحطت من قبلها بفتره

سؤال تانى
هل لو الوزير كانت عنده القدره انه يغير الامتحان فى يومين وده مستحيل
هل هيسمع لكلامكو ولا هتفرقو معاه

وزى مقولت مسبقا
اذا كان الكلام على كله وصعوبه الامتحانات مش هتفرق حاجه مع ابنك او بنتك لانها على زمايله كلهم

كل بقى الدوشه دى متوجهتش لحاجه صح
لاننا سيبنا المشكله الاساسيه

مشكلتنا الاساسيه هى ان الطلبه عددهم بيزيد والجامعات زى ماهيا
ودى المشكله الرئيسيه للثانويه العامه مش صعوبه الامتحانات

تخيلو لو كل المجهود المهدر
ساعات من برامج التوك شو ومئات من صفحات الجرائد
وتصريحات هنا وهناك
ووقفات ومظاهرات لو كل ده كان قام عشان مطلب واحد زياده سعه الجامعات
ولا بناء جامعات جديده فى المحافظات اللى مفيهاش

شوفو كنا ازاى نقدر نحل مشكله زى مشكله الثانويه العامه
بس احنا زى العبط
مسكنا فى البردعه وسيبنا الحمار

ومن الاخر بقى
انا مع الوزير لو كان هو اللى عايز يصعب الامتحانات ويخلى المجاميع تنزل
لانها هيا هيا يا بنى ادمين

الفرق ان مفيش حاجه اسمها ان اللى يجيب اقل من 97 يرمى نفسه فى البحر
وابقى عندى اوائل مرميين فى الزباله

انا كان ليا زمايل جايبين 94% ودخلو علوم

ورغم انى لا انسي اللى الوزير ده عمله فى طلبه الاخوان فى جامعه القاهره
لما دخل عليهم بلطجيه ضربوهم

بس ده مش موضوعنا دلوقت

عسل اسود

بعد السلام والكلام وازى الصحه والاولاد
وكام شتيمه ع البلد والحزب الواطى

امبارح شوفت عسل اسود



وبجد الفيلم ده جامد جدا ولازم يتشاف
انا قبل مدخل الفيلم كنت شايف حلقه ابراهيم عيسى اللى اتكلم فيها على الفيلم واشاد بحاجات وانتقد حاجات


ده فيديو حلقه ابراهيم عيسى

المهم
الفيلم اختصار بيحكى عن واحد ساب مصر وهو طفل ورجع بعد عشرين سنه
طبعا كان رسم لمصر الصوره بتاعه ايجيبت وارضى ووطنى وكده

ورجع بقى وانتو عارفين
شويه من اللى بتشوفوه كل يوم

الفيلم جامد جدا فى ابراز الحال اللى مجتمعنا بقى فيه
وازاى المصرى بقى مهان جدا فى بلده

انا مش هحكى احداث
بس انا اتفقت مع ابراهيم عيسى فى كذا نقطه
منها ان مشهد تقطيع البسبور المصرى لما حلمى رجع بسبوره الامريكى كان محتاج شغل اكتر

انما بقيه الفيلم مش محتاج لانه بجد عمل اللى عليه
الفيلم كسر الاوهام اللى احنا عايشين فيها زى الطفل المصرى اذكى طفل فى العالم
وان مصر ام الدنيا والهباله دى

مش هحكى نهايته لكن كلنا عارفين ان بجد البلد دى فيها دفء ومشاعر اكتر من اى بلد تانيه
وان كل مواطن حتى لو وحش من برا.. برده جواه المصرى الجدع اللى بيبان وقت الشده بس

اداء حلمى فى الفيلم روعه
ادى الدور بالظبط حتى فى طريقه نطق الكلام لشخص جاى من برا وانه مع الوقت بقى اصيع واحسن
وبرده المشهد اللى بان انه اتمرمط فيه فى بلده
وفى الاخر بقى واد صايع لدرجه انه قال كلام انا اللى متربى فى الشارع معرفتوش :D

فى الاخر
انصح اى حد انه يشوف الفيلم
وده الاعلان

فى الاخر مكنتش عايز حلمى يقول ان فى حاجات كتير وحشه

كان نفسي يقول يلا بقى نغير الوحش
مش لازم نشوف عظمتنا زى مقال ابراهيم عيسى واحنا بنتعايش مع الوضع الوسخ اللى احنا فيه
احنا لازم نقف ونغيره

معا سنغير